Белата куќа соопшти дека верува оти потезите на Кина да воспостави и прошири забрана за користење ајфони од страна на владините претставници се обид за одмазда кон САД.
„Секако, со загриженост гледаме на тоа. Се чини дека е нешто од оној вид агресивни и несоодветни одмазди кон американските компании што и во минатото ги имаме видено од НР Кина. Ова изгледа токму така“, изјави портпаролот на Советот за национална безбедност, Џон Кирби, за новинарите во средата.
„Вистината е дека немаме совршена транспарентност за тоа што точно прават и зошто и, секако, ги повикуваме да бидат потранспарентни за нивните постапки“, додаде тој.
„Блумберг њуз“ месецов објави дека Кина планира да ја прошири забраната за употреба на ајфони на низа компании и агенции под капа на државата, што е знак за растечките предизвици за „Епл“ (Apple) во земјата. Неколку кинески агенции почнаа да му укажуваат на персоналот да не ги носи своите ајфони на работа.
Ситуацијата стана понејасна во средата, кога Пекинг се спротивстави на извештаите за ограничувањата на ајфон-уреди, додека исто така ја зголеми загриженоста околу безбедносните проблеми со уредот.
„Кина нема издадено закони и регулативи за забрана за купување телефони на 'Епл' или странски брендови“, изјави портпаролката на Министерството за надворешни работи, Мао Нинг, на редовниот брифинг со новинарите во Пекинг. Тоа беше првиот владин коментар за ова прашање, но се чини дека не се однесува директно на забраните за уредите на работното место.
Мао рече дека владата ѝ придава „големо значење“ на безбедноста и дека сите компании што работат во Кина мора да ги почитуваат нејзините закони и прописи. „Забележавме дека има многу медиумски извештаи за безбедносни инциденти во врска со телефоните на 'Епл'“, рече таа.
Забелешките ги оставија американските инвеститори несигурни за статусот на „Епл“ во Кина - која е и производствена база на компанијата и нејзин најголем меѓународен пазар - токму во моментот кога се лансира новата генерација на ајфони. Акциите паднаа за 1,2 отсто во текот на денот.
Тензиите меѓу Кина и „Епл“ се дел од поширокиот судир меѓу двете најголеми економии во светот. САД го ограничија извозот на напредна опрема за производство на чипови во Кина, наведувајќи ги како причина стравувањата дека таквата технологија ќе помогне да се опреми војската на азиската земја. Кина воведе свои ограничувања на извозот и ја ограничи способноста на американскиот производител на чипови „Микрон“ (Micron Technology Inc.) да продава производи.
Коментарите на Мао за безбедносните инциденти беа малку поинакви во официјалниот англиски превод од брифингот. Тој превод, испорачан истовремено од страна на Министерството, го испушта повикувањето на медиумските „извештаи“. Брифинзите на Министерството за надворешни работи најчесто се ригорозно контролирани, а одговорите на портпаролите обично се пишуваат предвреме, со конзистентни преводи.
Кинеската прес-конференција дојде само неколку часа откако „Епл“ ја претстави најновата генерација од своите најпрепознатливи уреди, ајфон 15. Компанијата претстави четири нови модели, одржувајќи чекор со изминатите неколку генерации: ајфон 15, 15 плус, 15 про и 15 промакс. Преднарачките на уредот започнуваат в петок.
.webp){kind=icon}
