Маск меѓу главните гости на голем самит за вештачка интелигенција во Британија

Британскиот премиер Риши Сунак планира да одржи разговор во живо со Илон Маск по завршувањето на неговиот самит за вештачка интелигенција в четврток, давајќи му дополнителна тежина на настанот за кој Сунак се надева дека може да ја обликува регулацијата на новата технологија.

Премиерот во понеделникот објави за дискусијата со Маск на X - платформата за социјалнo вмрежување во сопственост на милијардерот. Соработниците на Сунак го промовираа настанот како доказ дека самитот планиран за среда и четврток добива на сила.

Тројца владини претставници на Обединетото Кралство рекоа дека очекуваат Маск исто така да присуствува на самитот во Блечли парк, иако Маск јавно не го потврди своето присуство. Ниту Маск, ниту претставниците на X и „Тесла“ (Tesla Inc.), каде тој е извршен директор, не одговорија на барањата за коментар.

Маск, најбогатиот човек на светот и сопственик на платформата X, порано позната како Твитер, почна да се занимава со Велика Британија во последните неколку дена, велат упатените извори, барајќи да останат анонимни бидејќи се работи за приватни дискусии.

Неговото присуство ќе му додаде помпезност на самитот, за кој Сунак се надева дека ќе привлече лидери на најголемите светски сили, како и врвни технолошки директори. Меѓу светските лидери се очекува да присуствуваат италијанската премиерка Џорџа Мелони и американската потпретседателка Камала Харис.
Сунак го свика самитот во обид да започне со изготвување на меѓународен пристап за регулирање на вештачката интелигенција со цел заштита од некои од нејзините најлоши потенцијални употреби, вклучително и местење избори и можност терористите да шират уништување преку олеснување на создавањето на хемиско и биолошко оружје. Во говорот во четвртокот, Сунак исто така предупреди на „неверојатна“ егзистенцијална закана доколку човештвото ја изгуби контролата врз технологијата.

Во јули, Маск ја основа xAI, компанија за вештачка интелигенција одвоена од другите негови компании, но која сепак планира да работи заедно со нив, според објавата на официјалната веб-страница. Тој беше вклучен во создавањето на „Опен еј-ај“ (OpenAI), најпознатиот стартап за вештачка интелигенција и развивач на ЧетГПТ (ChatGPT), но откако го напушти одборот во 2018 година, ја критикуваше компанијата, особено откако таа создаде огранок за профит следната година.

Во септември, на состанок во Вашингтон тој рече дека е важно за вештачката интелигенција да има „судија“. Во март, беше еден од стотиците технолошки лидери кои повикаа на пауза во развојот на технологијата.

Бред Смит од корпорацијата „Мајкрософт“, поранешниот заменик-премиер на Велика Британија, Ник Клег, сега претседател за глобални прашања во „Мета“ (Meta Platforms) и Џејмс Маника и Демис Хасабис од „Гугл“ и „Дипмајнд“ (DeepMind Technologies Ltd.) се меѓу 100 гости од 28 земји за кои е најавено дека ќе учествуваат на самитот.  

Во моментов нема коментари за веста. Биди прв да коментира...

Остави коментар