.webp){kind=icon}
„Мета“ се соочува со европска забрана за употреба на богатата база на лични податоци од корисниците на Фејсбук и Инстаграм за прикажување персонализирани огласи и реклами, во потег за кој гигантот за социјални мрежи тврди дека ги игнорира неодамнешните напори на компанијата да им даде на корисниците поголема контрола врз нивните податоци.
Ограничувањата, кои на 27 октомври ги одобри панелот на европски регулатори одговорни за спроведување на правилата за приватност на податоците во регионот, ќе ги продолжат привремените мерки што веќе се во сила во Норвешка.
Ирската комисија за заштита на податоците, која го надгледува спроведувањето на прописите за приватност на податоците за Европа во „Мета“, сега има две недели да „воведе забрана за обработка на лични податоци за рекламирање врз правна основа на договор и легитимен интерес“, се наведува во одговорот преку е-пошта од Грит Гисен, портпаролка на Европскиот одбор за заштита на податоци (ЕДПБ), на прашањата на „Блумберг“.
Регулаторите ги одобрија новите мерки токму кога „Мета“ го објави својот план да понуди користење на социјалните мрежи без реклами доколку корисниците плаќаат претплата. Моделот на претплата ќе биде во согласност со регулаторните барања, според компанијата.
Во соопштението „Мета“ наведува дека членовите на ЕДПБ „со недели се запознаени со овој план и дека со него се целосно подготвени да постигнат задоволително решение за сите страни“. Забраната „неправилно го игнорира тој внимателен и сеопфатен регулаторен процес“, додаваат тие.
Норвешкиот орган за заштита на податоците побара забраната да се прошири на цела Европа. Самата забрана на „Мета“ за рекламирање беше воведена во јули. Се однесува на „детално“ следење на активностите на корисниците на услугите на социјалните мрежи на „Мета“ и профилирање врз основа на тоа „каде се, каква содржина ги интересира и што објавуваат, меѓу другото“.
Зголемување на казната
Во август агенцијата ја казни „Мета“ со еден милион круни (околу 84.000 евра) поради непочитување на забраната.
„Казната досега достигна 79 милиони круни (6,7 милиони евра)“, изјави Тобијас Јудин, портпарол на норвешкиот регулатор.
Во јули Врховниот суд на Европската Унија во случај поврзан со Фејсбук на „Мета“ појасни дека обработката на личните податоци на корисниците за персонализирано рекламирање без нивна согласност не е во согласност со законите на ЕУ за заштита на личните податоци. Одлуката го зголеми ризикот од дополнителни регулаторни контроли за „Мета“.
Во одлуката исто така беше наведено дека иако „корисниците мора да бидат слободни лично да одбијат“ согласност за каква било непотребна обработка, не може да им се забрани да ја користат услугата, „што значи дека на тие корисници треба да им се понуди, доколку е потребно со соодветна такса, еквивалентна алтернатива што не вклучува таква обработка на податоци“.
Како резултат на тоа, „Мета“ од почетокот на ноември објави дека на корисниците во Европа ќе им понуди пристап до Фејсбук и Инстаграм на основа на претплата без прикажување огласи или реклами. Регулаторите сè уште разгледуваат дали планот ги исполнува нивните барања за тоа како компанијата ги собира личните податоци на корисниците.
Ирската агенција за заштита на податоци соопшти дека нејзината главна цел сега е да заврши со „детална анализа на моделот на согласност“ во соработка со другите европски регулатори.
