„Мајкрософт“: Кинески налози шират лажни слики за да направат поделби во САД

Кинески групи ги користат социјалните мрежи, како и слики генерирани од вештачка интелигенција (ВИ), за да предизвикаат контроверзии во САД за време на изборната година и да добијат увид во тоа како Американците гледаат на прашањата што предизвикуваат поделби, според наодите на „Мајкрософт“ (Microsoft Corp).

Налозите на социјалните мрежи поврзани со Кина шират конспиративна содржина, како што се обвинувања кон американската влада за шумските пожари во летото 2023 година на хавајскиот остров Мауи, се наведува во извештајот на компанијата објавен во петокот. Неколку дена по избувнувањето на шумскиот пожар, се наведува во извештајот, една кинеска група промовирала објави на 31 јазик, тврдејќи дека американската влада намерно го подметнала пожарот. Тие објави вклучувале слики генерирани со ВИ на кои биле прикажани крајбрежни патишта зафатени од оган.

Официјалната истрага за причините за пожарот што го уништи приморскиот град Лахаина на Хаваи е во тек, но истражителите се фокусираа на тоа дали далноводите во сопственост на „Хаваи електрик индустрис“ (Hawai Electric Industries Inc.) го предизвикале пламенот.

Фабрикуваните слики сигнализираат дека групи поврзани со кинеската влада усвојуваат нови методи додека земјата се придржува до долгогодишните геополитички приоритети преку континуирана кампања на дезинформации и сајбер-напади, посочуваат од „Мајкрософт“. Сепак, не е јасно дали вештачката интелигенција значајно го зголемила досегот или моќта на тие напори.

Од минатата есен, се наведува во извештајот на „Мајкрософт“, има „мал но стабилен пораст“ на налози на социјалните мрежи поврзани со Кина што поттикнуваат дебата на теми на поделба во американското општество.  Компанијата со седиште во Редмонд, Вашингтон, исто така откри дека кампањите за кинеско влијание се фокусирани на изборите во Тајван и пошироко на продлабочувањето на несогласувањата во азиско-пацифичкиот регион.

На денот на изборите во Тајван, пропагандна група поврзана со Кина „веројатно“ користела аудиоснимка генерирана од вештачка интелигенција во која Тери Гоу, сопственик на „Фокскон“ (Foxconn Technology Group) и поранешен претседателски кандидат, се чини дека поддржува друг кандидат, според извештајот. Во него се наведува дека кинеската група зад објавите за пожарните во Мауи исто така ширела пораки со кои се фрла сомнеж на безбедноста околу јапонското отстранување на радиоактивните отпадни води, правејќи конкретни напори да допре до луѓето во Јужна Кореја со кампања што „носи белези на користење генеративна вештачка интелигенција“.

„Мајкрософт“ „проценува со високо ниво на увереност“ дека налозите што го објавуваат овој материјал се под контрола на кинеската влада. Портпаролот на компанијата рече дека заклучиле оти кинеската влада командува со некои од групите идентификувани во извештајот, додека други се лоцирани во Кина и користат целење или техники што се адекватни за државна организација.

Кинеската амбасада не одговори на барањето за коментар. Владата обично негира каква било поврзаност со такви активности.

Истражувачите за дезинформации минатата година рекоа дека откриле слики генерирани со вештачка интелигенција на водители на вести што ги промовираат интересите на Кинеската комунистичка партија (ККП).

Употребата на вештачка интелигенција за производство на слики и видеа не мора да значи дека е убедлива тактика. Извештајот на „Мајкрософт“ открива дека овие напори добиле различен степен на повратна реакција и дека „влијанието на таквата содржина врз целната публика останува ниско“.

Овие напори се дополнија со предупредувањата од американската влада дека кинески хакерски групи се инфилтрирале во критична инфраструктура, вклучувајќи ги комуникациските, енергетските, транспортните и водните системи. 

„Мајкрософт“ посочи дека една таква група исто така цели на владините агенции и компаниите поврзани со националната одбрана, иако не е јасно дали тие напади биле успешни.

„Мајкрософт“ беше предмет на неодамнешен извештај на американската влада во кој се критикуваше одговорот на компанијата во однос на сомнителна кинеска кампања за сајбер-шпионажа.

Во моментов нема коментари за веста. Биди прв да коментира...

Остави коментар