Плаќањата преку мобилни апликации се зголемиле за 50 отсто

Се менуваат навиките на граѓаните и тие почесто плаќаат електронски, а заклучно со третиот квартал лани значително се зголемени трансакциите преку мобилни решенија, покажуваат податоците на Народната банка од доменот на платежната статистика.

„Трансакциите  со картички, издадени од домашните даватели на платежните услуги, пораснале за 10,2 отсто по број и за 13,6 отсто по вредност. Овој раст најмногу се должи на високиот годишен раст на бројот на плаќањата во е-трговијата во земјата, кој изнесува 29,2 отсто, како и растот од 8,8 отсто на плаќањата преку терминалските уред ПОС“, наведува НБРМ.

Зголемен е бројот на плаќања со платни налози. Бројот на платежните трансакции се зголемил за  9,9 отсто, а вредноста на остварените трансакции пораснала за 22,2 отсто.

„Ова укажува на натамошно зголемување на употребата на дигиталните канали за иницирање на овие плаќања. Најзначајни се резултатите од употребата на апликациите за мобилно плаќање, кои покажуваат годишен раст од 50,2 отсто во бројот на платежните трансакции споредено со истиот период од 2023 година“, наведува банката.

Граѓаните извршиле 65 отсто од вкупниот број електронски иницирани платни налози преку мобилните платежни апликации, што покажува дека мобилните апликации за плаќање стануваат сѐ попопуларни, бидејќи нудат побрзи и поедноставни решенија за  иницирање на платежните трансакции.