.webp){kind=icon}
Македонската компанија „Веда“ е добитник на прва награда на меѓународен натпревар за иновации. Нивната иновација за двојна заштита на литиумските батерии, што помага за сузбивање пожар, е меѓу петте наградени производи од страна на Министерството за одбрана на САД. Меѓународниот натпревар се однесува на иновативни технологии во областа на водата, електричната енергија и синтетичката боилогија.
„Се работи за производ, кој е само еден дел од нашата гама на производи за сузбивање и гаснење на пожар, односно овој производ, за кој добивме награда, е двостепена заштита на литиумските батерии од палење. Тоа е нешто што се случува внатре во самата батерија. Значи не е никаков надворешен уред што се додава, туку дополнителната заштита е интегрирана внатре во самата батерија“, вели Искра Јанковска Михајловска, косопственик и извршен директор на „Веда“, потенцирајќи дека нивните производи не се за гаснење на пожар, туку за сузбивање во моментот на настанување на пожарот.
На натпреварот аплицирале 40 компании, од кои само 20 беа одбрани да се натпреваруваат со своите креативни решенија. Првото место на македонската компанија „Веда“ и’ донесе парична награда од 60.000 долари.
„Наградата е парична, но самиот натпревар е голем предизвик и траеше неколку месеци“, објаснува Јанковска Михајловска.
Дел од познатите производи на оваа компанија е и нетоксичната аеросолна супстанца за сузбивање пожар, која што може да се користи во простории каде што има луѓе и животни.
„Производот го сузбива пожарот за помалку од 5 секунди, со тоа што не одзема кислородот од просторијата, туку со хемиска реакција се гаси огнот. Со тоа луѓето и животните не се загрозени од супстанцата“, објаснува директорката на „Веда“.
За почетоците и дејноста на компанијата, како и детали околу нивните иновации и натпреварот, од кој што се вратија како победници, погледнете го целото видео од разговорот со Искра Јанковска Михајловска за Блумберг Адриа ТВ.
