Платата на директорот на Алфабет се зголеми на 226 милиони долари

Пакетот плата и надоместоци на главниот извршен директор на „Алфабет“ (Alphabet Inc.), Сундар Пичаи се зголеми на 226 милиони долари во 2022 година, главно од тригодишниот бонус во акции, што го прави еден од најплатените корпоративни лидери во светот.

Од вкупниот надомест, наградниот дел во акции изнесува 218 милиони долари, според поднесокот од матичната компанија „Гугл“. Тој доби вкупно 6,3 милиони долари како компензација во 2021 година, кога не доби надомест во акции, а неговата плата остана стабилна на 2 милиони долари во последните три години.

50-годишниот извршен директор се движи во поконкурентна индустрија, со производи со вештачка интелигенција, како што е четботот ЧетГПТ од стартапот „Опен Еј Ај“, кој се заканува да ја поткопа доминацијата на „Гугл“ во пребарувањето. Поголемото технолошко забавување, исто така, и нанесе штета на компанијата, со пад на акциите за 39 проценти во 2022 година. Сепак, тие се вратија во 2023 година, зголемувајќи се за 19 проценти.

Наградата во акции на Пичаи доаѓа на тригодишен распоред, а тој доби пакет со слична големина во 2019 година. Таа година, извршниот директор беше награден со 281 милион долари.

Надоместокот за извршните директори стана особено чувствителна тема во технолошката индустрија - особено по бранот отпуштања во „Алфабет“ и во други големи компании. Извршниот директор на „Епл“ (Apple Inc.), Тим Кук, ја намали својата плата во 2023 година, откако се „подналути“ што заработи по 100 милиони долари годишно во последните две години.

Минатогодишната плата го стави Пичаи многу над другите директори на „Алфабет“ во 2022 година. Прабакар Рагаван, постар потпретседател за знаење и информации на „Гугл“ и Филип Шиндлер, главен деловен директор, заработија околу 37 милиони долари. Компензацијата на главниот финансиски директор Рут Порат изнесуваше 24,5 милиони долари. Нивните надоместоци во акции се даваат на годишна основа.

Во јануари, „Алфабет“ започна со укинување на околу 12.000 работни места, или 6 проценти од својата глобална работна сила, по неколкумесечните мерки за намалување на трошоците и поставување на нови приоритети. Просечниот вкупен надоместок за вработените во „Алфабет“ беше 279.802 американски долари во 2022 година. Надоместокот на Пичаи беше 808 пати поголем од тој износ.

Како дел од неговиот пакет за компензација, „Алфабет“ потрошил 5,94 милиони долари за лично обезбедување на Пичаи.

Во моментов нема коментари за веста. Биди прв да коментира...

Остави коментар