Очилата за проширена реалност на „Епл“ (Apple) ќе чинат 3.499 долари и ќе тестираат дали потрошувачите се подготвени да потрошат толку пари на технологијата што компанијата ја гледа како иднина на компјутерите.
Производителот на ајфони ги претстави новите очила вижн про (Vision Pro) на својата годишна конференција за програмери во понеделникот, што е кулминација, која доаѓа по повеќе од седум години развој. Претставен со зборовите на Стив Џобс - „уште една работа“ - производот ја внесува компанијата во нова сфера и првата голема нова категорија откако почна да продава паметни часовници во 2015 година. Вижн про може да биде и едно од најризичните лансирања во историјата на компанијата.
„Епл“ демонстрираше безброј карактеристики на очилата и содржини наменети за производот, вклучувајќи игри и интерактивно видео од „Волт Дизни“ (Walt Disney). Уредот, кој личи на високотехнолошки очила за скијање, ќе има сопствен оперативен систем, вижн ОС (visionOS), и специјална продавница за апликации. Планирано е на почетокот на следната година да биде достапен во САД, а подоцна и во други региони.
„Епл“ се надева дека вижн про е револуционерен нов производ, кој може да му помогне на технолошкиот титан да го одржи растот на продажбата. Ќе се обиде да ја редефинира индустријата што сè уште е во зародок на ист начин како што тоа претходно го направи со мек (Mac), ајпод (iPod), ајфон (iPhone) и ајпад (iPad). Разликата овој пат е во тоа што „Епл“ лансира производ со висока цена - и влетува во пазар што досега не е широкоприфатен од потрошувачите.
Во поширока смисла, „Епл“ има намера да го промени начинот на кој луѓето комуницираат со светот. „Епл“ долго време бара нова платформа што ќе ги надмине ајфон и ајпад, а ова би можело да биде тоа. Уредот комбинира виртуелна реалност (VR) и зголемена реалност (AR), што значи дека може целосно да го внесе корисникот во содржините со слика во висока резолуција, што е идеално за гледање видеа, и додава апликации во видното поле на корисникот, без да наметне чувство дека сте „бомбардирани“ од содржини.
„Ова е првиот производ на 'Епл' каде што нема да гледате во него, туку ќе гледате низ него“, рече извршниот директор Тим Кук за време на презентацијата.
Тим Кук
Bloomberg
Инвеститорите засега се скептични. Акциите се искачија блиску до рекордното ниво во понеделникот, но повторно паднаа по објавувањето на вижн про. До затворањето во Њујорк, тие беа намалени за 0,8 отсто, на 179,58 долари.
Маркетиншката моќ на „Епл“ е неспоредлива и ги привлече потрошувачите да трошат сè повеќе и повеќе на паметни телефони, но овој производ можеби е еден од нивните најголеми предизвици. Ривалските очила на пазарот чинат само неколку стотици долари. Цената од 3.499 долари би ги ставила очилата во доменот на лаптоп од висока класа, а не во сферата на додатоци.
Bloomberg
Компанијата го опишува новиот интерфејс како „просторен компјутинг“. Функцијата наречена ајсајт (EyeSight) прикажува слика од вашите очи од надворешната страна на очилата кога луѓе се во ваша близина. Производот исто така ќе ги прикаже тие луѓе во вашето видно поле додека го носите уредот, што е обид да ги натера корисниците да останат во интеракција со надворешниот свет.
Таканаречената дигитална круна - термин земен од епл воч - ја менува функцијата на очилата меѓу зголемена и виртуелна реалност. „Епл“ соопшти дека проучувал илјадници човечки глави за да се увери дека производот ќе биде удобен и има поднесено повеќе од 5.000 патенти. Очилата имаат два главни чипа. Тука е M2-процесорот од мек, кој се носи со главните компјутерски задачи, и другиот чип R1, кој работи со наменски сензори што овозможуваат мешана реалност.
Ваквиот потег на „Епл“ несомнено води до ривалство со „Мета“ (Meta Platforms), која моментално поседува 81 отсто од пазарот на ВР-очила, според „Кантерпоинт рисрч“ (Counterpoint Research). „Епл“ очекува да продаде околу 900.000 единици од вижн про во првата година, а со оглед на цената, тоа може да ѝ даде на компанијата поголем удел на пазарот. Сепак, тие бројки би биле само дел од она што го генерираат другите уреди.
Извршниот директор на „Дизни“, Боб Ајгер, се вклучи во презентацијата, велејќи дека услугата за стриминг „Дизни +“ (Disney+) ќе биде достапна за уредот на денот кога ќе биде лансиран. Акциите на „Дизни“ се зголемија за помалку од еден процент, на 91 долар.
„Веруваме дека Епл вижн про е револуционерна платформа, која може да ја претвори нашата визија во реалност“, рече Ајгер.
Други слични компании, како „Нетфликс“ (Netflix), и производители на апликации, како „Зум“ (Zoom Video Communications), исто така ќе можат да креираат свои апликации за уредот.
Очилата ќе бидат компатибилни со многу апликации за ајфон и ајпад без дополнителна работа од нивните креатори. „Епл“ објави платформа за развој на софтвер што ќе им овозможи на трети страни да изградат сопствен софтвер за вижн про.
Bloomberg
„Епл“ го наведе „Јунити“ (Unity Software Inc.) како компанија со која работи на уредот, поради што акциите на „Јунити“ пораснаа за 17 проценти во понеделникот.
Од технолошка гледна точка, вижн про е еден од најнапредните потрошувачки уреди што се направени. Очилата имаат десетина камери, двојни 4K микро ЛЕД-екрани и можност за снимање 3Д-фотографии и видеа. Користи надворешна батерија, која трае два часа, или може да се приклучи на ѕид за целодневна употреба.
Дебито на очилата беше финале на денот исполнет со софтверски и хардверски најави на конференција за програмери на „Епл“, каде што компанијата исто така ги претстави новите компјутери мек и новиот софтвер за своите водечки уреди. Сепак, беше јасно дека Кук се надева оти најсилниот впечаток кај потрошувачите ќе го остави вижн про - и дека уредот ќе ја постави сцената за нешто повеќе.
„Епл“ веќе работи на поевтина верзија на очилата, објави „Блумберг“, како и на уште поквалитетен модел.
„Ова е само почеток“, рече тој.
.webp){kind=icon}
