Шефот на „Индид“ сака да создаде „киборг-регрутери“ користејќи ВИ

Крис Хајмс ја води страницата за огласи за работа „Индид“ (Indeed), на која има 30 милиони работни позиции - од камионџии на долги релации до финансиски директори во повеќе од 60 земји. Во текот на изминатата деценија, „Индид“, која е во сопственост на јапонската „Рикрут Холдингс“ (Recruit Holdings Co.), еволуираше од листа на огласи за отворени позиции во онлајн центар каде што барателите на работа и регрутерите меѓусебно се анализираат и се спроведуваат интервјуа за вработување.

Деновиве, индустријата за вработување се соочува со двоен удар - отпуштања, што особено тешко ги погоди редовите на корпоративните регрутери и појавата на генеративна вештачка интелигенција, која се заканува да го надмине едноставното скенирање на биографијата и да почне да пишува описи на работни места, па  дури и да договара плати. Како одговор на тоа, Хајмс анализира како вештачката интелигенција може да ги надополни тие улоги, а не да ги замени. Извршниот директор неодамна ја посети канцеларијата на „Блумберг“ во Њујорк за да разговараме за враќањето на работниците во канцеларија, како се справи со првото отпуштање во „Индид“ и за неговиот план да создаде „киборг-регрутери“ кои ќе играат на силата и на луѓето и на вештачката интелигенција.

Кога последен пат разговаравме во февруари, рековте дека на пазарот на трудот има забавување, но дека е сепак силен. Што би рекле сега?

Има некои знаци на слабост во неодамнешните извештаи за отворање работни места, но целокупната слика продолжува да покажува стабилен пазар на труд. Освен за маркетинг и развој на софтвер: тоа се првите два сектори каде побарувачката е помала отколку што беше пред пандемијата. Од декември до јули, огласите за маркетинг работни места на „Индид“ се намалени за 10 проценти. А објавите за работни места за копирајтери беа уште повеќе погодени, намалени се за 35 проценти, делумно поради ЧетГПТ (ChatGPT).

Работните места се намалени и во „Индид“. Вие елиминиравте 15 проценти од вашиот персонал, или 2.200 луѓе, во март. Гледајќи наназад на тоа, дали би постапиле поинаку?

Кога имавме повеќе работа, ние продолживме да вработуваме се повеќе и повеќе луѓе. Никогаш претходно не сме имале отпуштање во компанијата. Но, ние не пресековме речиси ништо од нашиот тим за вештачка интелигенција или од безбедносниот тим. Направивме поголеми намалувања кај регрутирањето. Жалам што имам такво влијание врз животите на луѓето.

Многу компании бараат од луѓето почесто да се враќаат во канцеларијата, што некои работници го доживуваат како „квака“ за отпуштање. Како е во „Индид“?

Ние веруваме дека не постои единствено искуство - секој ден на канцеларија или целосно далечински - што би функционирало најдобро за секого. Околу една третина од нашите вработени се продажни тимови кои работат директно со клиентите и тие доаѓаат на работа во вторник и среда. И тука е интересното: тимовите кои треба да доаѓаат во вторник и среда доаѓаат околу 2,05 дена во неделата. Остатокот, кој воопшто не мора да доаѓа во канцеларија, доаѓа во канцеларија три, три и пол дена во неделата. Тоа е некако чудно.

Како се разликуваат вашите стапки за враќање во канцеларија во зависност од градот?

Никој не оди во канцеларијата во Сан Франциско. Просечната исполнетост таму е 12 проценти. Но, имаме околу 40 проценти исполнетост во Остин.

Како тоа ги обликува вашите потреби за недвижнини?

Затворивме 12 канцеларии и гo консолидиравме просторот во уште осум. Во Остин, од четири сега имаме две канцеларии.

Како ја користите вештачката интелигенција за да го подобрите бизнисот со наоѓање работа?

Префрливме околу 50 наши луѓе за регрутирање на производ што го нарекуваме „Индид хајр“ (Indeed Hire). Станува збор за агенција која им помага на другите компании да ангажираат персонал. Ние користиме вештачка интелигенција за да ја направиме оваа улога поефикасна. Кои се аспектите на регрутирањето кои се повторуваат, кои се досадни? Мислам на тоа како еден вид киборг модел - машините и луѓето работат заедно. Не се обидуваме луѓето да ги замениме со роботи. Сакам да изградам костум на „Ијрон Мен“ (Iron Man) за регрутери.

Знаете ли што се случи со Тони Старк во последниот филм „Авенџерс“ (Avengers)?

Ги спаси сите, нели? Тој умре за да можеме да живееме. И костумот живее.

 

 

Во моментов нема коментари за веста. Биди прв да коментира...

Остави коментар