.webp){kind=icon}
Вештачката интелигенција (ВИ) драстично ќе ги намали трошоците за создавање блокбастер анимирани филмови, според долгогодишниот директор на индустријата Џефри Каценберг.
„Не знам индустрија што ќе биде повеќе погодена од кој било аспект на медиумите, забавата и креацијата“, рече Каценберг на панел-дискусијата на форумот за нова економија на „Блумберг“ во четвртокот. „Во старите добри времиња можеби ќе ви требаа 500 уметници и години за да снимите анимиран филм од светска класа. Мислам дека за три години нема да бидат потребни ни дури 10 отсто од тоа“.
„Усвојувањето на вештачката интелигенција десеткратно ќе ја забрза дигиталната трансформација на забавната индустрија“, рече Каценберг (72), кој се издигна како извршен продуцент во компанијата „Волт Дизни“ пред да се здружи со режисерот Стивен Спилберг и со извршниот директор на Холивуд Дејвид Гефен.
На Каценберг му се придружија и други светски лидери во размислувањето како новите технологии ќе го променат начинот на кој живееме и работиме на вториот ден од форумот во Сингапур.
Сара Менкер, основачка и извршна директорка на „ГРО интелиџенс“ (GRO Intelligence), рече дека машинското учење помага да се предвидат побарувачката, понудата и цената за сите земјоделски производи низ светот - а исто така помага да се извлечат увиди од големи збирки податоци и да се подобри процената на ризикот. Но расте и проблемот со премногу модели: во нејзиниот сектор има 2,9 милиони модели.
Џефри Каценберг/Bloomberg
Исто така, претпазлив за замките на вештачката интелигенција е Каи-Фу Ли, четиридецениски ветеран за развој на системот за вештачка интелигенција, кој предупреди дека она што го видовме со „Кембриџ аналитика“ пред неколку години сега е на стероиди, алудирајќи на тони податоци од корисници на Фејсбук, собрани од сега веќе непостојната фирма. Сепак, Ли тврди дека регулативата мора да биде умерена за да се избегне задушување на иновациите.
„Возбудата околу вештачката интелигенција како одлична нова работа не беше придружена со потребната обука и разбирање“, рече Боб Мориц, глобален претседател на „ПвЦ“ (PwC).
„Во моментов се соочуваме со огромен предизвик дека ако одиме предалеку, пребрзо, без да ја преобликуваме работната сила, всушност имаме голема неусогласеност, што создава повеќе социјални проблеми“, рече Мориц. „Тоа ќе биде проблематично, особено кога влегуваме во забавена економија“.
