.webp){kind=icon}
Индустријата за обработка на плаќања бележи големи промени, со зголемена побарувачка за безготовински плаќања од страна на клиентите, посочуваат од аналитичкиот тим на „Блумберг Адрија“ во новата анализа на „Блумберг Адрија инсајт“ (Bloomberg Adria Insight). Тие откриваат дека вредноста на безготовинските плаќања во ЕУ имаше сложена стапка на годишен раст од речиси четири проценти во 2013 година, која се зголеми на шест проценти во 2016 година. По пандемијата, растот на безготовинските плаќања забрза и изнесуваше 16 проценти во 2021 година. Вредноста на безготовинските плаќања на ЕУ достигна неверојатни 278 илјади милијарди евра во 2021 година или 1.900 проценти од БДП на ЕУ (наспроти 1.700 проценти во 2013 и 2016 година).
Со оглед на тоа што обработката на трансакциите е најраспространетата услуга во банкарството, нашите аналитичари во овој извештај се фокусираат на трендовите во индустријата и развојот на пазарот во регионот Адрија наспроти земјите од ЕУ.
Тие очекуваат континуиран пораст на вредноста на овој вид плаќања во регионот Адрија, а тоа го базираат на два главни фактори.
„Зголемената пенетрација на безготовинските трансакции на долг рок поради моментално ниската основа и натпросечната инфлација, која позитивно влијае на големината на вредноста на плаќањето на краток рок. Спротивно на тоа, кај провизиите за плаќање, според наше мислење, ќе има намалување, и тоа поради пазарната конкуренција помеѓу постојните играчи, новата конкуренција што произлегува од иновативните решенија за плаќање и повисоките договорни попусти односно пониски провизии за трговците што би требало да следуваат со зголемувањето на обемот на трансакции“, велат аналитичарите.
Сите анализи се овде.
Тие информираат дека во регионот Адрија вредноста на безготовинските плаќања како процент од БДП е меѓу најниските во Европа и само Македонија брзо се приближува кон европските лидери.
„Кога се споредува бројот на безготовинските плаќања по трансакциска сметка, Хрватска и Словенија стојат околу европските просеци, додека Србија и Македонија се далеку зад нив. Причините за тоа ги гледаме во фактот дека луѓето едноставно сакаат повеќе да користат готовински плаќања, а е-трговијата е во рана развојна фаза“, велат аналитичарите.
Според нив, дигитализираното опкружување донесе зголемување на конкуренцијата на традиционалните банки, и тоа не само од дигиталните стартап-банки туку и од небанкарските финансиски институции, финтек-секторот и големите технолошки гиганти.
„Во вакво конкурентно опкружување, очекувањата на клиентите се сменија - сега тие бараат поиновативни производи и подобра услуга“, велат аналитичарите.
„Клучна порака за финансиските резултати на компаниите од регионот Адрија се високите маржи на профитабилност, високиот принос на капиталот и ниската задолженост. Индустријата за обработка на плаќања е бизнис што не бара значителен капитал, а доказ за тоа се извонредните приноси на капиталот испорачани од компаниите што беа предмет на споредба“, велат аналитичарите.
Тие укажуваат дека просечниот поврат на капиталот изнесува 32 процента и додаваат дека трошоците за вработените генерално зафаќаат најголем дел од расходите во билансите на компаниите. Потоа следуваат трошоците поврзани со обработката, како што се опремата и инфраструктурните трошоци, вклучувајќи ги и трошоците за одржување на софтверските апликации. Трошоците за вработените кај компаниите од регионот во просек зафаќаат 30 проценти од продажбата.
„Состојбата се пресликува кај глобалната група компании што беа предмет на споредба. Тие имаат повисоки стапки на раст во споредба со компаниите од регионот Адрија, но помали маржи, помали приноси и значително поголема задолженост. Растот на продажбата беше поттикнат од иницијативите за раст, како што се стекнување нови трговци, зголемување на обемот на обработка на плаќањата, одредени други услуги што им се продаваат првенствено на издавачите и последно, но не и најмалку важно, поради спојувањата и аквизициите што значително ја зголемија големината на компаниите, како „Некси“ (Nexi), „Ворлдлајн“ (Worldline), „Фиделити“ (Fidelity), „Фајсирв“ (Fiserv) и „Блок“ (Block)“, велат аналитичарите.
Тие додаваат дека покрај тоа, силната конкуренција ги принудила компаниите да одат со полна брзина и да се однесуваат непрудентно, па оттука и високата средна задолженост мерена преку соодносот нето-долг/ЕБИТДА.
