Индустријата за домашни миленици во последната деценија постојано расте, а тековните промени во демографијата и начинот на живот ги поддржуваат очекувањата за нејзин понатамошен раст, посочуваат аналитичарите на „Блумберг Адрија“ во новата регионална анализа за трендовите во оваа индустрија. Тие додаваат дека пандемијата на ковид-19 и работата од дома особено го поттикнаа растот на индустријата.
„Во однос на изгледите за индустријата за домашни миленици во регионот Адрија, очекуваме забавување на нагорниот тренд на раст на продажбата, бидејќи луѓето постепено (но не целосно) се враќаат на работа од канцеларијата, а има дополнителен притисок од постојано високата инфлација и слабеењето на куповната моќ на потрошувачите. Очекуваме дека употребата на премиум-производи за домашни миленици ќе биде помала, при што производите од помалите приватни брендови ќе имаат корист, бидејќи клиентите се свртуваат кон поевтини производи. Иако обемот би можел да биде помал, продажбата сепак се очекува да биде на слично ниво поради надуените цени“, велат нашите аналитичари.
Според нив, зголемувањето на влезните трошоци во текот на 2022 година, како состојките (месо и земјоделски култури), така и материјалот за пакување тешко може целосно да се пренесе на крајните потрошувачи како во претходните години, особено во некои земји од регионот.
„Тоа ќе резултира со зголемен притисок врз маргините на профитабилноста во продажниот сегмент. На позитивната страна, промените во демографијата и социјалните промени се бафери на сите потенцијални контракции на пазарот. Со стареењето на населението - луѓе што живеат сами подолг период и растечките лични приходи, економијата на домашните миленици има силни позитивни изгледи да расте на долг рок“, велат аналитичарите.
Сите анализи на истражувачкиот тим на „Блумберг Адрија“ на нашиот портал „Блумберг Адрија инсајт“ (Bloomberg Adria Insight) се овде.
Тие укажуваат дека трошењето за домашни миленици е во силна корелација со целокупното ниво на богатство - колку повисоки лични примања, толку повеќе пари луѓето трошат на домашни миленици.
„Податоците на Еуростат покажуваат дека во ЦИЈИЕ најголем дел од трошоците на домаќинствата за производи за домашни миленици има во Унгарија (7,5 проценти во 2023 година), при што домаќинствата во земјите на регионот Адрија трошат помеѓу 1,2 и 4,9 проценти за производи за домашни миленици. Во целокупната индустрија за домашни миленици, клучната категорија е храна за домашни миленици, која се карактеризира со висока концентрација на мултинационални брендови: ’Педигри’ (Pedigree), ’Вискас’ (Whiskas) и ’Ројал канин’ (Royal Canin) се произведени од ’Марс пет кер’ (Mars Pet Care), ’Пурина’ (Purina) произведена од ’Нестле’ (Nestle) или ’Хилс“(Hills) произведена од ’Колгејт Палмолајв’/’Хилс пет нутришн’ (Colgate Palmolive/ Hills Pet Nutrition)“, велат од нашиот аналитички тим.
Оттаму посочуваат дека во регионот Адрија, производствениот сектор е доста слаб и главно се состои од релативно мали компании во приватна сопственост со низок обем на производство и продажба.
„Единствениот исклучок е ’Фармина пет фудс Србија’ (Farmina Pet Foods), дел од италијанската ’Фармина груп’ (Farmina Group), која во 2021 година беше меѓу 10-те водечки европски производители според обемот на продажба“, велат аналитичарите.
Во споредбената анализа тие вклучуваат претставници од најголемиот дел од економијата на домашни миленици - од голем број трговци на мало присутни на пазарот до ретки чисто дистрибутивни бизниси и производствени компании.
„За најдобри претставници на пазарните трендови ги избравме трговците на мало со најголем број продавници и најголем пазарен удел. Растот на продажбата на дистрибутивните компании со високи ’тинејџерски’ бројки во последните три години е вистински доказ за развојот на индустријата и нејзината отпорност на турбуленции на пазарот“, велат аналитичарите.
Според нив, се чини дека бизнисот со домашни миленици е профитабилен, бидејќи сите страни бележат солидни маржи на профитабилност и високи приноси на вложениот капитал.
„Производителите од регионот имаат посилни маржи од малопродажните компании. Трговците на мало, генерално фокусирани на обемот на продажба и нешто пониските маржи и соочени со висока конкуренција, успеаја да постигнат високи приноси благодарение на добрата профитабилност и генерално пониската капитална база потребна во бизнисот“, велат аналитичарите.
Тие додаваат дека силните основи за трошење на домаќинствата ги зголемија финансиските средства кај трговците на мало во последните години.
„Тоа објаснува зошто продавачите на производи за домашни миленици испорачуваат приближно двапати повисоки ЕБИТ-маржи од трговците на мало со широк опсег на намирници. Се чини дека брзото намирување на обврските кон доставувачите е модел што трговците го претпочитаат, најверојатно поради подобрите попусти и потенцијалот за генерирање поголема профитабилност. Иако ова би сугерирало поголема потреба од обртни средства, задолженоста останува ниска, со поволен просечен нето-долг/ЕБИТДА сооднос од 0,4 пати во 2021 година“, велат аналитичарите.
