.webp){kind=icon}
Во април 2022 година, просечната каматна стапка на вкупните кредити изнесува 4,30 отсто и е непроменета на месечна основа, додека на годишна основа е намалена за 0,28 процентни поени (п.п.). Просечната каматна стапка на вкупните депозити изнесува 0,68 отсто и бележи месечен и годишен пад од 0,02 п.п. и 0,22 п.п., соодветно, соопшти Народната банка.
Во април, просечната каматна стапка на новоодобрените кредити е повисока за 0,23 п.п. на месечна основа и изнесува 3,98 отсто. На годишна основа, оваа каматна стапка е намалена за 0,11 п.п. Просечната каматна стапка на новопримените депозити изнесува 0,65 отсто и забележа месечен пад од 0,03 п.п., додека на годишна основа е зголемена за 0,03 п.п.
Каматната стапка на новоодобрените кредити на корпоративниот сектор, во април, бележи месечен раст од 0,32 п.п. и изнесува 3,63 отсто.
„Нагорната промена е резултат на растот на каматните стапки на денарските кредити со и без валутна клаузула (за 0,75 п.п. и 0,30 п.п., соодветно), во услови на пад на каматните стапки на кредитите во странска валута (за 0,20 п.п.). Споредено на годишно ниво, каматната стапка на новоодобрените кредити на корпоративниот сектор е намалена за 0,22 п.п.“, објаснуваат од Народната банка.
Во април, просечната каматна стапка на новоодобрените кредити на домаќинствата, бележи месечен раст за 0,04 п.п. и изнесува 4,51 отсто.
„Анализирано по валута, нагорната промена се должи на растот на каматните стапки на денарските кредити со и без валутна клаузула (за 0,09 п.п. и 0,01 п.п., соодветно), додека каматните стапки на кредитите во странска валута бележат пад (за 0,07 п.п.). На годишна основа, оваа каматна стапка е зголемена за 0,02 п.п.“, информираат од Народната банка.
Може да се очекува дека трендот на зголемување на каматите на кредитите и на депозитите ќе продолжи и во наредниот период со оглед на тоа што Народната банка во април и во мај во два навртати ја зголеми основната каматната стапка од 1,25 на 1,75 отсто.
Со тоа, централната банка упати сигнал дека е време банките да ги корегираат каматите на кредитите и на депозитите во нагорна линија, а за да се поттикне штедењето и да се намали потрошувачката со цел да се запре инфлаторниот бран што ја зафати земјава.
