text size
Мобилните апликации што овозможија брзо повлекување на милијарди долари во депозити само за неколку часа oд банката „Силикон валеј“ (СВБ) го нагласуваат новиот ризик за планирањето на ликвидноста на банките, според највисокиот американски регулатор.
„За да се усогласат со тековните регулативи, банките претпоставуваат дека депозитите на физичките лица ќе течат со стапка од околу пет проценти во период од 30 дена, но способноста на клиентите веднаш да ги преместат своите пари значи дека одливите би можеле да бидат многу поголеми во иднина“, рече во средата Мајкл Хсу, претседател на Канцеларијата на контролорот на валутата (Office of the Comptroller of the Currency). Домаќин на настанот во Северна Каролина беше ФДХ (FDX), непрофитна организација што создава стандарди за споделување финансиски податоци.
„Веќе постои чувство дека онлајн и мобилното банкарство можеби овозможија невообичаено големи и брзи одливи на депозити од СВБ и 'Сигначур' (Signature Bank) минатиот месец“, рече Хсу. Иако можноста за брзо и лесно преместување средства од банкарските сметки „ќе им даде сила на потрошувачите, најверојатно ќе го зголеми ризикот за банките во однос на ликвидноста на депозитите од граѓаните“.
СВБ пропадна минатиот месец откако клиентите финансирани со ризичен капитал, исплашени од објавите на социјалните мрежи и јавните пораки, повлекоа десетици милијарди долари и депозити само за неколку часа. „Сигначур“ пропадна само неколку дена подоцна, откако се соочи со сопствено сценарио на брзо повлекување депозити. Во услови на превирања, акциите на банките брзо паднаа.
Банките и доставувачите на финансиска технологија со години разговараа за подемот на таканареченото отворено банкарство во САД, што ќе им олесни на потрошувачите да ги префрлат своите финансиски податоци на финтек-апликации и во ривалските банки. Застапниците на овој процес велат дека отвореното банкарство ќе ја подобри и зачува конкуренцијата во финансиските услуги, додека противниците велат дека тоа би можело да ги зголеми безбедносните ризици.
„Канцеларијата на контролорот на валутата има очекувања за управувањето со ризиците од водење бизнис со трети страни што ги контролираат тие односи“, рече Хсу.
„Приспособувањата на тие очекувања може да бидат неопходни како што се развиваат отвореното банкарство и финтек-пејзажот“, додаде тој.
Хсу предупреди дека технолошките гиганти како „Епл“ (Apple Inc.), „Алфабет“ (Alphabet Inc.), и „Амазон“ (Amazon.com Inc.) продолжиле да влегуваат во финансиски услуги во последните години. Тој нагласи дека ова бара „внимателен мониторинг“ од регулаторите, кои долго време се обидуваат да ја зачуваат поделбата меѓу банкарскиот и трговскиот сектор.
.webp){kind=icon}
