Банките под притисок – јагма за парите од унгарскиот кредит

Фирмите бараат многу повеќе пари од тоа што банките можат да им дадат. Државата преку унгарскиот кредит стави на располагање 250 милиони евра за македонските компании. Интересот особено е зголемен откако беше проширена намената за овие кредити, кои првично беа најавени само за инвестиции во производствени капацитети и обновливи извори на енергија.

Минатата недела привршуваа активностите за потпишување на рамковните договори меѓу Развојната банка и деловните банки. Од Развојната банка за „Блумберг Адрија“ велат дека очекуваат оваа постапка да заврши во краток рок со сите преостанати банки. Од банките информираат дека компаниите од претходно најавувале дека ќе поднесат барање за кредит, а сега се во постапка на собирање на потребната документација. По комплетирањето на документите, и формално ќе можат да поднесат барање.

Сите банки добија одреден лимит

Со договорите што ги склучуваат банките е утврден одреден лимит за секоја банка одделно. Најавените барања што ги добиле „Комерцијална банка“ и НЛБ се поголеми од лимитот што им е одреден.

„Интересот од компаниите за користење финансиски средства од унгарската кредитна линија е голем, а особено доби интензитет во изминатите две недели, кога се објави информацијата дека ќе се прошири намената на кредитите, кои првично беа најавени само за инвестиции во производствени капацитети. Вкупниот износ на најавените барања за кредит значително го надминува утврдениот лимит за банката за користење средства од оваа линија“, одговорија од „Комерцијална банка“ за „Блумберг Адрија“.

Интересот ги надминува и капацитетите на линијата, со оглед на тоа што е проширен опсегот на дејности што можат да аплицираат. „Првенствено, оваа линија беше предвидено да се насочи кон производствени и извозно ориентирани фирми, но со последните измени, корисници на ова финансирање можат да бидат широк опфат на дејности што вложуваат во основни средства“, ни рекоа во НЛБ.

Се собираат документите

Рано е да се зборува за тоа колку компании формално поднеле барање за кредит затоа што постапките за собирање на потребната документација е во тек.

„Компаниите постојни клиенти на ‚Комерцијална банка‘ што имаат доставено барања за користење инвестициски кредити и ги исполнуваат условите дефинирани од Владата и од РБСМ, а наедно ги исполнуваат и интерните критериуми на банката за користење средства од оваа кредитната линија, веќе ја обезбедуваат потребната документација за користење средства од линијата“, велат од „Комерцијална банка“.

„Блумберг Адрија“ разговараше со менаџери во компании што се заинтересирани за парите. Тие велат дека е неизвесно дали ќе добијат дел од нив затоа што интересот е огромен и процедурите одат бавно.

Сепак, надлежните уверуваат дека пари ќе има доволно затоа што најголемиот број заинтересирани компании имаат најавено барање во повеќе од една банка. Кога ќе стигнат формалните барања, состојбите ќе се искристализираат.

Како ќе се префрлаат парите?

Банките ќе ги повлекуваат парите етапно, како што ќе одобруваат проекти. Кои проекти и износи ќе ги одобруваат ќе одлучуваат сами. Максималниот одобрен износ по компанија не смее да надминува 10 милиони евра.

„Банката учесник ќе повлекува средства во согласност со договорот, во зависност од износот на одобрените инвестициски проекти од нивна страна. Врз основа на поднесено барање од страна на банките, Развојната банка поднесува барање за повлекување транша до Министерството за финансии“, велат од Развојната банка.

За кредитите можат да аплицираат фирми што не се странски директни инвеститори кои користат државна помош. Кредит исто така не може да добијат компании од секторот производство и трговија со алкохол освен со пиво и вино, производство на тутун и компании за коцкање, игри на среќа и слично.

Со овие кредити нема да може да се рефинансираат стари обврски, ќе бидат наменети за инвестиции. Услов за апликантите е да обезбедат учество во висина од 20 отсто од бараниот износ. Рокот на отплата е до 15 години, а компаниите ќе имаат грејс период од три години. Каматата изнесува 1,95 отсто.

Значително пониска камата

Оваа камата е значително пониска од моменталната на пазарот. Според последните податоци на Народната банка, каматната стапка на вкупните кредити за корпоративниот сектор заклучно со декември изнесува 4,96 отсто, а за новоодобрените кредити 4,39 отсто.

Заклучно со декември вкупната задолженост на корпоративниот сектор изнесува близу четири милијарди евра (242.338 милиони денари). На годишна основа растот на кредитите во корпоративниот сектор изнесува 13,9 отсто, покажуваат податоците на НБРМ.