Инфлацијата не ги поколеба инвеститорите на Волстрит – сè уште „јаваат“ на балонот на ВИ

По месеци неизвесност, септември донесе драматичен пресврт на Волстрит, но не таков каков што очекуваа инвеститорите. Точно кога „Оракл“, благодарение на вештачката интелигенција, оствари рекордни резултати и го разбуди пазарот, пристигнаа и не баш многу добри податоци за инфлацијата. Но тие не го нарушија пазарот значително. Иако приходите и профитот на компанијата за првото фискално тримесечје беа малку под процените, инвеститорите ги занемарија тие бројки.

Фокусот беше на клучната метрика: вредноста на потпишаните договори што сè уште не се наплатени (RPO), која скокна неверојатни 359 отсто, достигнувајќи астрономски 455 милијарди долари. Сепак, тој оптимизам брзо го смири упорноста на најголемиот непријател на инвеститорите – инфлацијата.

Вештачката интелигенција како гориво за иднината

„Потпишавме четири договори вредни повеќе милијарди долари со три различни клиенти во првото тримесечје“, изјави извршната директорка на „Оракл“, Сафра Кац, додавајќи дека очекува RPO во наредните неколку месеци да надмине половина трилиони долари. Овој огромен заостаток во нарачките сигнализира повеќегодишен однапред обезбеден раст, што е информација што на инвеститорите им даде ретко видено ниво на сигурност.

Главниот поттикнувач на овој раст е експлозивната и, изгледа, незаситна побарувачка за компјутерски услуги во облак, потребни за развој и примена на вештачката интелигенција. „Оракл“ се позиционираше како клучен играч во овој сегмент, нудејќи компјутерска моќ неопходна за тренирање и користење ВИ-модели. Познато е и дека еден од тие договори е склучен со компанијата „Опен еј-ај“, креаторот на ЧетГПТ, и тоа на пет години, и е со вредност од дури 300 милијарди долари.

Прогнозите на компанијата дополнително ја потврдија оваа теза. „Оракл“ сега очекува дека приходите од компјутерски услуги во облак ќе пораснат од 18 милијарди долари во тековната фискална година дури на 144 милијарди долари до 2030 година. „Никогаш не сум добил повик како оној кога една компанија го побара нашиот целокупен достапен капацитет за користење ВИ-технологија“, рече коосновачот и технички директор Лари Елисон, илустрирајќи ја големината на побарувачката.

Упорен оптимизам и покрај инфлацијата

Реакцијата на пазарот на веста од „Оракл“ беше моментална и силна. Акциите на компанијата пораснаа за 36 отсто за еден ден тргување, што е нивниот најголем дневен скок од 1992 година. Пазарната капитализација на компанијата порасна за повеќе од 250 милијарди долари, приближувајќи се кон вредност од трилион долари, а Лари Елисон, според индексот на милијардери на „Блумберг“, стана најбогатата личност во светот, престигнувајќи го Илон Маск.

Еуфоријата предизвикана од бумот на ВИ првично беше прекината од најновиот извештај за потрошувачките цени, кој не им донесе возбуда на инвеститорите. На годишно ниво, инфлацијата забрза и последното мерење изнесува 2,9 отсто, додека основната инфлација (без храна и енергија) остана тврдоглаво висока на 3,1 отсто.

Овие податоци краткотрајно го променија расположението, но не за долго. По отворањето на американскиот пазар, продолжи растот на поголемиот дел од технолошкиот сектор. Да потсетиме, повисоките каматни стапки претставуваат директна закана за технолошките акции чија вредност се базира на идни приходи, правејќи го нивното финансирање поскапо, а инвестициите помалку привлечни.

Триумфот на „Оракл“ стана тест за целиот пазар, соочувајќи ја силата на технолошката револуција со тврдоглавата макроекономска реалност. Прашањето што сега го мачи Волстрит е дали бумот на ВИ ќе биде доволно силен да го надвладее стравот од покачените камати што ги носи инфлацијата. Исходот од оваа битка ќе го одреди правецот на пазарот до крајот на годината.