„Challenger“ (Челинџер) е иновативна мобилна апликација, која што сѐ повеќе зема замав и секојдневно ја зголемува својата популарност. Веќе има илјадници корисници, кои не ги губат залудно чекорите направени во текот на денот, или вртежите на велосипед, туку преку апликацијата користејќи ја својата физичка активност собираат поени, што потоа ги користат за да купат нешто или да добијат попуст во некоја од продавниците, партнери на Челинџер.
За тоа што конкретно претставува апликацијата, која е целта и кои сѐ поволности ги нуди, разговаравме со еден од коосновачите на мобилната апликација „Challenger“, Олга Рајчиќ.
Олга Рајчиќ/„Challenger“
Блумберг Адриа (ББА): Како се роди идејата за Челинџер?
Олга Рајчиќ: Идејата за „Challenger“ започна на „Startup Weekend 2018“, каде се запознавме јас, Теодора и Стефан. Идејата на апликацијата е едноставна, преку натпреварување и награди ги мотивираме корисниците да направат нешто добро за општеството и за планетата. Корисниците на „Challenger“ секој ден пешачејќи или возејќи велосипед завршуваат предизвици, освојуваат награди и добиваат поени. На крај овие поени може да се искористат за купување производи во „Challenger“ продавницата, или за попуст кај некои од партнерите.
ББА: Колкумина се дел од Челинџер? Да очекуваме ли надградба и нови опции и услуги за уште поголем еко предизвик за корисниците?
Олга Рајчиќ: Нашиот тим на ко-основачи се состои од Теодора, Стефан, јас, Митко и Симон, како и нашиот инвеститор Димитар. Но, ние немаше да успееме да дојдеме до ова скалило каде што сме денес без остатокот од тимот, а тоа се Елена, Бојана, Јована, Добре, Наташа, Огнен, Александар и сите оние кои не поддржуваат безрезервно. Moментално започнуваме со разработка на нови функционалности за да може да понудиме повеќе активности кои ќе ги мотивираат корисниците да живеат одржливо (храни се здраво, рециклирање, штедење електрична енергија, волонтирање, донирање таму каде што е потребно и др), а од друга страна ќе им помогне на компаниите да ги следат своите општествено одговорни активности.
ББА: Која е целта на апликацијата?
Олга Рајчиќ: Нашата цел е да создадеме платформа преку која ќе им помогнеме на компаниите заедно со нивните вработени да имаат уште поголемо влијание во средината во која делуваат. Јас верувам дека наредните 12 месеци ќе слушате многу новости и успеси за „Challenger“ бидејќи оваа приказна штотуку започнува да расте и се прошири на регионални пазари, во Хрватска, Босна и Херцеговина, Косово, Бугарија, а следуваат уште неколку пазари.
Олга Рајчиќ/„Challenger“
ББА: Освен „Challenger“ кои други производи се достапни?
Олга Рајчиќ: Изминатиот период го создадовме производот „Challenger@work“, кој им помага на компаниите да ги мотивираат своите вработени да користат одржливи методи на транспорт, а воедно и со тоа да заштедуваат ЦО2 емисии во воздухот. Нашите дигитални продукти генерираат податоци, кои помагаат во визуелизација, т.е. им помагаат на луѓето и компаниите да согледаат како секоја мала активност (како пешачење и возење велосипед) го подобрува општеството. Функционалноста треба да го поттикне тимскиот дух, но и да ги мотивира корисниците да пешачат и да возат повеќе за да ги освојат наградите од предизвиците. Со вклучување на компаниите на „Challenger“ тие се препознаваат како општествено одговорни компании. Апликацијата е бесплатна и достапна за сите корисници на „Android“ и „iOS“ оперативните системи, а компаниите кои сакаат да се вклучат може да не контктираат на info@challenger.mk.
ББА: Која е Вашата приказна? Како да се мотивираат останатите да делуваат и придонесуваат за почиста околина?
Олга Рајчиќ: Кога ја лансиравме Challeger сфативме колку луѓе околу нас се всушност еко херои, само што не можеме да ги видиме и препознаеме. Токму затоа, како што тие нас не инспирираа, така одлучивме да правиме интервјуа со нив за да служат како инспирација за останатите. Нашата цел e да создадеме алатка која ќе ги поттикнува граѓаните и компаниите да се грижат за околината, само што ние одлучивме да го направиме тоа на забавен начин преку натпревар и награди. Секој еден од нас треба да се натпреварува сам со себе да стане подобар човек и граѓанин, а на „Challenger“ ќе се натпреварувате со луѓе кои се токму како вас, затоа приклучете ни се.
Олга Рајчиќ/„Challenger“
ББА: Дали сметате дека можеби треба и државата и локалните власти да се мотивираат за подобра инфраструктура и соодветни услови за еко сообраќај? Како да се постигне тоа?
Олга Рајчиќ: Дефинитвно за да постигнеме поголеми промени треба да се здружат сите чинители на едно општество. Локалните власти се важен играч во обезбедувањето на подобра инфраструктура, но тука не треба да застанеме. Јас сметам дека како се обезбедува инфраструктура така треба да се создава и критична маса на граѓани кои ќе ги одбираат алтернативните начини за транспорт. Ние како дигитална алатка сме секогаш расположени за соработка со сите чинители за да постигнеме видливи резултати и промени. Замислете колку би било убаво во соработка со стартапите кои работат на оваа тема, невладини организации и градот Скопје да работиме заедно за да станеме вело и зелен град во регионот. Ние сме расположени и подготвени за големи нешта, но таа цел мораме здружено да ја реализираме.
ББА: За да се одлучите да го работите ова мора силно да верувате дека секоја идеа може да придонесе за подобра животна средина и полесно справување со предизвиците од глобалните еко промени. Како да се постигне тоа? Како да се поттикнат претприемачите да размислуваат во таа насока и бизнисите да ги прилагодуваат, па и целосно да ги адаптираат за справување со еко предизвиците?
Олга Рајчиќ: Зборувајте за вашата идеја, бидејќи верувајте дека никој не може да ви ја украде, па дури и да ви ја украде (односно да ве имитира) верувајте ми, вие ќе направите уште поуспешна приказна бидејќи ќе менувате работи и ќе се подобрувате. Зборувајќи за идејата можеби ќе си го пронајдете и вашиот тим, како што јас ги сретнав Стефан и Доде.
-Бидете подготвени за критики, тие се неизоставен дел од вашиот пат. Дел од нив прифаќајте ги како добронамерни, а дел од нив ќе ве допрат и можеби ќе ви го повредат егото, но на крај свртете се околу вас и видете што сте постигнале. Ние во тимот велиме и ако не успее оваа верзија, ќе направиме нова што ќе биде уште подобра од претходната. Создавањето на нов производ/услуга е процес преку кој ќе созреете како професионалци и личности. Ова е искуство што засекогаш ќе ви го промени животот од секој можен аспект.
-Не се плашите да згрешите бидејќи колку и да звучи клише, од грешките најмногу се учи.
Олга Рајчиќ/„Challenger“
ББА: Претпоставувам дека сте во комуникација со еко-ентузијастички настроени претприемачи од странство. Споделувате ли искуства? Каде сме ние во споредба со регионот, па и светот?
Олга Рајчиќ: До сега сме немале комуникација со еко-ентузијастички настроени претприемачи од странство, но токму затоа периодов се насочивме кон влегување на други пазари и токму оваа комуникација ќе ни биде од огромна важност. На локално ниво се поддржуваме меѓусебе со еко-ентузијастички настроени претприемачи и веруваме дека само ако сме здружени можеме да постигнеме поголеми резултати.
ББА: Има ли соодветна поддршка и лесно достапни начини за финансирање на вакви проекти и бизниси, како што е Вашиот, со цел повеќе инвестиции, побрз развој и поголема додадена вредност на бизнисот?
Олга Рајчиќ: За жал, поддршката за финансирање во нашата држава е лимитирана, а само тоа не ни овозможува брз раст. Нашиот тим се нема откажано и после две години работа, со цел да направиме продукт кој ќе направи промена на регионално и европско ниво. Среќни сме што годинава го добивме и првиот инвеститор во компанијата, но сега сме во потрага за повеќе средства со цел да ги искористиме каналите за продажба на пазарите каде што работиме оваа година. На локално ниво сме веќе претпознатлив бренд кој носи вредност на своите корисници и клиенти, сега е време регионот да дознае за нас, а токму затоа ни е потребен „ветер во грб“, за да го забрзаме својот развој, да додадеме нови функционалности и да ги освоиме срцата на регионот.
ББА: Што ќе порача тимот на Челинџер?
Олга Рајчиќ: Не се откажувајте дури и кога е невозможно. Направете чекор назад, согледајте што ви кажува пазарот, зборувајте со потенцијалните клиенти и видете како може вашиот продукт да биде решение на нивни горливи прашања. Не се плашете од пилотирање и приспособување на вашата идеја, продукт или услуга. Благодарение на упорната работа и вербата успеавме да го создадеме „Challenger@work“, кој покажува одлични резултати, а воедно покажуваме дека вработените може да ги мотивираме да бидат дел од општествената корпоративна агенда на својата компанија. Им препорауваме на компаниите да ни се придружат и заедно да правиме промени во заедниците во кои делуваме.
.webp){kind=icon}
Во моментов нема коментари за веста. Биди прв да коментира...