.webp){kind=icon}
Пазарот на недвижности во Берлин е толку затегнат што наглото зголемување на трошоците за задолжување се чини дека само накратко го запре растот на цените.
Трошоците за купување новоизграден стан во германската престолнина пораснаа за 0,8 отсто во последниот квартал, делумно поништувајќи го остриот пад од претходните три месеци, според податоците што за „Блумберг њуз“ (Bloomberg News) ги состави фирмата за рекламирање недвижности „Имобилен скаут“ (Immobilien Scout). Квадратен метар сега се продава во просек за 6.093 евра, што е за околу 100 отсто повеќе од пред само седум години.
Деценискиот пораст на цените на становите во Германија нагло запре минатата година, откако Европската централна банка (ЕЦБ) почна да ги зголемува каматните стапки. Тие потези ги удвоија - а во некои случаи и тројно ги зголемија - хипотекарните стапки за купувачите на станови, принудувајќи многумина да го напуштат пазарот, и предизвикаа пад на бараните цени низ целата земја.
Цените на недвижностите во Берлин паднаа само еднаш. Новоизградените станови поскапеа во првиот квартал.
Bloomberg
Цените на постојните станови во Берлин паднаа втор квартал по ред, покажуваат податоците на „Имобилен скаут“. Сепак, тој пад од 0,3 проценти е екстремно мал и следува по пад од 5,3 проценти во претходниот квартал, што укажува дека и ова наскоро ќе се промени.
Ако и кога ќе се случи тоа, ќе се вратат претходните тенденции. Додека една деценија ниските каматни стапки доведоа до пораст на цените на недвижностите низ Германија, на неколку места е забележана драматична експлозија, како во Берлин, каде што има исклучително мала понуда.
Германската престолнина долго време се соочува со сериозна неусогласеност меѓу понудата и побарувачката на пазарот за изнајмување, при што владините бројки покажуваат дека околу 26.000 луѓе во Берлин на почетокот на минатата година спиеле во засолништа, на каучи или на друг начин без постојана адреса. Некои истражувачи проценуваат дека градот ќе мора да изгради повеќе од 100.000 стана за да ја задоволи побарувачката.
Недостигот од станбен простор доведе до зголемување на кириите, што пак ги зголеми цените. Со оглед на тоа што инфлацијата неодамна достигна рекордно високо ниво, сопствениците беа во искушение да ги прекршат строгите прописи за контрола на цените во Берлин и да наплаќаат уште повисоки кирии.
Други извори од индустријата исто така укажуваат дека германскиот пазар на станбени недвижности веќе се вратил во претходната ера на постојани поскапувања. „Еуропејс“ (Europace), показател за цените што го следи германскиот пазар за недвижности од месец на месец, се зголеми во февруари, ставајќи ѝ крај на серијата од седум последователни падови, која започна во јули минатата година.
