Нов рекорд: Становите поскапеа за над 25 отсто во третиот квартал

Продолжува растот на цените на становите во земјава. Во третиот квартал, според податоците на Народната банка, недвижностите поскапеле за 25,1 отсто. На месечна основа изнесува 4 отсто.

Цените на метар квадратен растат иако трошоците во градежништвото бележат опаѓање за првпат по осум години, но цените на становите се нееластични на ваквите движења, што придонесува кон проширување на оперативните маржи во градежниот сектор, констатираат од Народната банка во последниот извештај за финансиската стабилност на Македонија за 2024 година.

„Вкупните трошоци за изградба на нови станбени згради во 2024 година опаднаа за 7,2 проценти на годишна основа, наспроти растот од 9,4 проценти во претходната година. Главен чинител на падот се значително пониските материјални трошоци, за 10,5 проценти, при стабилен пад во сите четири тримесечја. Придонес во падот на материјалните трошоци има и пониската постигната цена на истргуваното градежно земјиште за 9,5 проценти, по високиот пад од 32,7 проценти во 2023 година“, наведуваат од Народната банка.

Прв пат по пет години минатиот месец и Агенцијата за катастар на недвижности во објави регистарот на цени и закупи кои се однесуваат на вториот квартал од годината. Според тие податоци, најскапиот стан продаден во државата во периодот од 1 април до 30 јуни е во скопската општина Центар. Метар квадратен за овој стан чини над 2.700 евра (166,563 денари). За 96 метри квадратни наплатени се 260.000 евра. Просечната цена на метар квадратен е највисока во Центар и изнесува 100,044 денари или над 1600 евра. Во Струмица каде се продаваат најевтините квадрати, просечната цена е за 1000 евра пониска отколку во Центар.

Во вториот квартал од годинава продадени се помалку станови отколку во првиот квартал – реализирани се купопродажни договори за 676 новоизградени станови од инвеститор, што е за 178 станови помалку во споредба со првиот квартал од годинава.

До крајот на годината истекува и времената мерка со која становите се продаваат со данок на додадена вредност од 5 отсто. Министерството сè уште нема излезено со став дали од Нова година становите ќе се продаваат со повластена стапка на ДДВ или таа ќе се врати на нивото од 18 отсто како што беше пред 15 години.

Градежниците велат дека доколку ДДВ се зголеми тоа ќе падне на товар на купувачите што значи дека цените дополнително ќе се зголемат. Тоа ќе претставува вистински предизвик за младите кои за прв пат купуваат сопствен стан. Во другите земји од регионот каде стапките на ДДВ за недвижности се повисоки отколку во Македонија, за овие категории граѓаните, владите вршат поврат на ДДВ за првото купување стан.