Нова регулатива: Владата воведува даночни олеснувања за бизнис-ангелите

Владата подготвува предлог-закон за поттикнување на индивидуалните инвеститори (бизнис-ангели) со кој се предвидува јасно дефинирање на нивната улога, обезбедување правна сигурност, зголемување на нивната активност, како и воведување даночни ослободувања и мерки за поддршка, што би требало да стимулира инвестиции во стартапи. Меѓу другото, новата регулатива треба да го поттикне економскиот раст преку иновации, отворање нови работни места и подобрување на конкурентноста.

„Бизнис-ангелите претставуваат значајни актери во развојот на економијата, особено преку поддршката на стартапи и иновативни компании. Во Македонија улогата на бизнис-ангелите е маргинализирана поради тоа што постојното законодавство не нуди јасна дефиниција или регулација за бизнис-ангелите. Отсуството на законска рамка што ги дефинира правата и обврските на бизнис-ангелите создава несигурност кај инвеститорите, бидејќи не постои посебна заштита за нивните вложувања, ниту пак поддршка за нивното инвестирање во компаниите“, се наведува во образложението.

Даночни олеснувања

Нацрт-законот предвидува бизнис-ангелите на кои им е издадено решение за упис на инвестицијата во регистарот на инвестиции на бизнис-ангели да имаат право на 50 проценти ослободување од данок на личен доход по основ на дивиденда остварена со учество во добивката на друштвото во кое имаат инвестирано, а за период од пет години од денот на стекнување со уделот во друштвото. Се предлага и ослободувања од 100 проценти од данок на личен доход за капитална добивка остварена од продажба на уделот (ангелската инвестиција) до вредноста на 100.000 евра во денарска противвредност, односно ослободување од 50 проценти за делот од капиталната добивка што го надминува износот од 100.000 евра во денарска противвредност, а под услов бизнис-ангелот да не го отуѓува уделот  во период од три години откако се стекнал со него.

„Вкупната, кумулативна вредност на износите за кои се доделуваат даночните ослободувања не може да го надмине износот од 250.000 евра во денарска противвредност. Начинот на спроведување на даночните ослободувања од данокот на личен доход ги пропишува министерот за финансии во соработка со министерот за економија и труд“, се наведува во документот.

Depositphotos

Можности и ограничувања

Според предлог-регулативата, бизнис-ангелите ќе може да инвестираат во друштво со ограничена одговорност и да се стекнат со право да ги користат законските поволности доколку друштвото е класифицирано како микро, мал или среден трговец во согласност со Законот за трговски друштва, не се наоѓа во постапка за стечај и ликвидација, нема котација на хартии од вредност и нема сопственичка, управувачка, организациска поврзаност со бизнис-ангел пред настанување на инвестицијата.

Нема да се сметаат за ангелски инвестиции и нема да се применуваат одредбите од законот за инвестициите направени во следните области: банкарство, осигурување и реосигурување на пазарот на капитал, финансиско посредување и други активности од финансиската област, трансакции со недвижности, изнајмување недвижности, посредување со недвижности, развој на недвижности, игри на среќа и обложување, производство или продажба на челик, производство или продажба на јаглен, производство или продажба на оружје, муниција, експлозиви, тутун, алкохол, растенија, наркотични и психотропни супстанции, како и консултантски услуги во која било област.

„Бизнис-ангел може да ги користи поволностите утврдени со овој закон доколку неговата инвестиција е исклучиво во пари и притоа не е пониска од 5.000 евра во денарска противвредност и не е повисока од 250.000 евра во денарска противвредност“, пишува во нацрт-регулативата.

Дополнително, се предвидува бизнис-ангел или група на бизнис-ангели, без оглед на тоа дали вложува еднаш или повеќепати, да може да се стекне со најмногу 25 проценти од сопственоста во друштвото во кое вложува.

„Степенот на вклученост на индивидуалниот инвеститор (бизнис-ангел) во трговското друштво во кое вложува се ограничува на содружник што не смее да прима плати или други надоместоци од работен однос од трговското друштво во кое вложува. Бизнис-ангел не може да биде управител на трговското друштво во кое вложува“, се наведува во документот.

Основање мрежи на бизнис-ангели

Нацрт-законот предвидува и можност за основање мрежи на бизнис-ангели. Во него се истакнува дека „мрежите на бизнис-ангели се основаат со цел да се промовираат и зајакнат соработката, размената на информации и спојувањето на индивидуалните инвеститори што располагаат со финансиски средства со претприемачите што имаат потреба од финансирање“.

„Мрежите на бизнис-ангели се непрофитни правни лица што се организираат во согласност со одредбите на Законот за здруженија и фондации. Мрежите работат во согласност со прописите утврдени во овој закон, со законите што имаат супсидијарна примена и другите релевантни важечки прописи“, пишува во документот.

Таму се додава дека мрежите на бизнис-ангели може да учествуваат во активности со кои се стимулира ангелското инвестирање и да аплицираат за добивање средства од буџетот на Македонија и други донатори со кои се промовира и стимулира ангелското инвестирање.

„За да можат да аплицираат за средствата, мрежите на бизнис-ангели мора да докажат дека во нив членуваат најмалку три индивидуални инвеститори, чии инвестиции се регистрирани во регистарот на инвестиции на индивидуални инвеститори“, се истакнува во документот.

Во моментов нема коментари за веста. Биди прв да коментира...

Остави коментар