.webp){kind=icon}
Иако стапката на невработеност во САД е на најниско ниво во последните 53 години, многу работници сè уште се подготвуваат за отпуштања, при што клучното прашање за нив е кога, а не дали.
Сè поголем број вработени се потпираат на план Б или Ц, кој би го искористиле во услови на големи кратења на работните места и песимистичките изгледи низ индустриите. Тоа може да биде заштеда на малку повеќе пари секој месец, извршување некои дополнителни работи настрана, кои би можеле да преминат во постојано вработување, или отвореност за менување на кариерата доколку е потребно.
„Луѓето гледаат да ја заштитат својата кариера во иднина“, вели Роберт Боерсма, потпретседател за операции во Северна Америка на платформата за барање работа „Талент“ (Talent.com).
Тој вели дека зголемениот пристап до кратки задолженија преку работа базирана на апликации е клучен двигател на овие навики, како и високата инфлација и секојдневните трошоци. „Навистина голем број луѓе велат: Па, ги гледам насловите. Се чувствувам несигурно поради тоа.“
Најавени се десетици илјади кратења на работните места во индустриите што се движат од технологија преку издаваштво до финансии, а пребарувањата на „Гугл“ (Google) во врска со отпуштања се зголемија во последните месеци. Еден од пет работодавци изјавил дека очекува неговата работна сила да се намали во следните три месеци, покажа истражување од јануари спроведено од Националната асоцијација за бизнис-економија.
Отпуштањата го зајакнуваат заедничкото чувство: околу 70 отсто од американските работници велат дека ќе бидат загрижени за безбедноста на работата за време на следната рецесија, според истражување од ноември на „Инсајт глобал“ (Insight Global). Во одделно истражување од „Талент“, 45 отсто од испитаниците рекле дека најверојатно ќе преземат задолженија настрана во услови на економска несигурност.
Подготовка за отпуштања
Фиби Гавин, тренерка за кариера и лидерство во Њујорк, не сака да западне во неизвесност.
„Се подготвував да добијам отказ уште откако ја презедов оваа работа“, напиша таа на Твитер кога беше отпуштена од „Вокс медија“ (Vox Media) во јануари. Како двократен ветеран на кратење работни места во претходните улоги, Гавин го минала поголемиот дел од изминатата деценија надградувајќи ги своите заштеди и започнала да дава услуги за совети за кариера со скратено работно време во 2019 година.
„Тоа е столче со три ногалки“, рече Гавин во едно интервју. „Станува збор за финансискиот дел, но исто така и за вашата мрежа и надградбата на вашите вештини“.
Во истата низа од објави на Твитер, таа посочува дека со полно работно време ќе се фокусира на својот тренерски бизнис.
„Последователните потреси од отпуштањата може да траат и до една деценија, што ги прави работниците помалку уверени дека нивната следна работа ќе трае долго, па сметаат дека е поверојатно да се подготват за ’судниот ден’“, вели Дениз Русо, професор по организациско однесување на универзитетот „Карнеги Мелон“. Пред пандемијата, околу четири од 10 работници барем еднаш доживеале отпуштање или друга форма на губење на работната позиција.
Сепак, создавањето финансиски душек е полесно за некои работници отколку за други. Се проценува дека 64 отсто од Американците живееле од плата до плата на крајот на 2022 година, околу 3 процентни поени повеќе од претходната година. Платите не се во чекор со инфлацијата, а повисоките трошоци за сè, од кирија до јајца, ги притиснаа буџетите на потрошувачите.
Промена на позиции
Како резултат на тоа, работниците размислуваат за алтернативни. Истражувањето на „Талент“ покажа дека 24 отсто од работниците рекле дека дефинитивно би ја смениле индустријата доколку имаат потреба, а 39 отсто посочиле дека веројатно ќе го сторат тоа.
Џесика Хетерих, менаџерка во салон во Нешвил, Тенеси, станала уморна од чувството на неизвесност и вознемиреност. Таа прво била отпуштена шест месеци откако станала дел од пазарот на трудот во 2010 година и повторно две години подоцна. Додека аплицирала за технолошки позиции во 2021 година, Хетерих на крајот целосно се откажала од канцелариска работа, одлука за која станува сè посигурна дека била исправна со секој нов наслов што ќе го види во врска со кратење на работните места.
Таа исто така работела на акумулација на личните заштеди и се пријавила за пазарно осигурување што првично не било врзано за нејзината работа.
„Сфатив дека сум само бројка во статистиката и дека морам да внимавам на себе“, вели Хетерих. „Отсекогаш ме учеа: работи напорно, угоди му на шефот и биди лојална на компанијата за да бидеш наградена. Но тоа не е баш секогаш така“.
