Македонија се најде на 71. место меѓу 134 држави рангирани според Индексот на глобална конкурентност за таленти за 2023 година што го подготвува „Инсид“ (Insead), а кој покажува колку една нација е способна да привлече и да задржи таленти.
Швајцарија го задржа првото место на листата, одбележувајќи една деценија доминација во трката за привлекување на „кремот“ меѓу човечкиот капитал. Сингапур и САД се најдоа на второто и третото место на листата во која доминираат европските нации - седум од првите десет.
Од земјите од регионот Адрија најдобро пласирана е Словенија, на 28. место на листата, потоа Хрватска (45 место), Србија(53. место) и БиХ (83. место).
Швајцарија се најде на прво место поради високите нивоа на социјална заштита и нејзината природна средина. Според извештајот, квалитетот на животот и одржливоста ќе бидат „критична предност за оние кои имаат за цел да станат центри за таленти“ во следната деценија.
„Високо образованата работна сила и иновативната економија“ го издигнаа Сингапур во категоријата на најдоброто место во категоријата глобални вештини за знаење, додека САД се најдоа на прво место по растечки таленти поради своите „универзитети и бизнис школи од светска класа“.
Помеѓу другите земји, Велика Британија се најде на 10-то место во генералниот пласман според јачината на високото образование и имаше доминантни резултати во општите вештини за знаење и раст на таленти и покрај ниските оценки во стручните и техничките вештини.
Кина се најде на првото место меѓу државите од БРИКС (Кина, Бразил, Индија, Русија и Јужна Африка). Нејзиниот статус како „глобален лидер во усогласувањето на вештините на луѓето со потребите на економијата“ беше нарушен од нејзината „Ахилова пета“ - привлекувањето таленти, што придонесе да се најде дури на 40-то место на листата.
Индија, најнаселената нација во светот, се најде на 103-то место, паѓајќи на листата во последните три години од 2020 година и е на дното меѓу земјите од БРИКС. Според авторите, падот на деловното расположение ја попречи нејзината способност да привлече таленти дома и од странство.
Конкуренцијата за таленти меѓу нациите може да стане уште пожестока во следните 10 години, според извештајот, во кој се наведуваат зголемените несигурности во трговијата, инвестициите и геополитиката. Извештајот стави акцент на способноста на земјите, градовите и организациите за иновации и да проектираат мека моќ.
Ова може да создаде дополнителен диспаритет меѓу богатите и сиромашните земји бидејќи „корелацијата богатство/талент останува силна“, според „Инсид“.
Извештајот, исто така, покажа дека ковид ја зајакна родовата нееднаквост, бидејќи паритетот на висококвалификуваните работни места се намали во текот на изминатите три години од врвот во 2019 година.
Вештачката интелигенција може да го влоши овој тренд бидејќи „неквалификуваната или нискоквалификуваната работна сила ќе сноси голем дел од дополнителниот притисок, додека новите категории работници, некои со повисоки вештини, ќе страдаат од посилна конкуренција од алгоритми и специјализирана опрема“.
Со помош на Кевин Варли (Блумберг)
.webp){kind=icon}
Во моментов нема коментари за веста. Биди прв да коментира...