Илјадници работници во складиштата на „Амазон“ во околу 40 земји планираат да учествуваат во протести и штрајкови што ќе се совпаднат со распродажбата за црн петок, еден од најпрометните денови во годината за онлајн купувањето. Вработените во САД, Обединетото Кралство, Индија, Јапонија, Австралија, Јужна Африка и дел од Европа бараат подобри плати и работни услови додека се продлабочува кризата со трошоците за животот. Сето тоа ќе се одвива под мотото „Направи 'Амазон' да плати“ (Make Amazon Pay). Кампањата ја координира меѓународна коалиција на синдикатите, со поддршка од еколошки и граѓански здруженија.
„Време е технолошкиот гигант веднаш да престане со својата грозна небезбедна практика, да ги почитува законите и да преговара со работниците што сакаат да ја подобрат својата работа“, рече Кристи Хофман, главна секретарка на синдикатот „Уни глобал“ (UNI Global Union), еден од организаторите на кампањата. Напнатоста со работниците долго време претставува проблем кај гигантот во е-трговијата, кој се соочува со поплаки за непочитување на работната практика, како и со активизам на вработените и синдикалните акции во некои погони. Моментот што се смета за пресвртен е кога работниците во складиштата во Стејтен Ајленд, Њујорк, гласаа уште претходно во текот на годинава да му се придружат на новоформираниот синдикат.
„Иако не сме совршени во ниту едно подрачје, ако објективно погледнете што прави ’Амазон’ со овие важни работи, ќе видите дека својата улога и своето влијание ги сфаќаме многу сериозно“, рече портпаролот на „Амазон“, Дејвид Ниберг. Тој наведе дека целта на компанијата е до 2040 година да достигне нето нулта емисија на стакленички гасови, како и да продолжи да нуди конкурентни плати и големи бенефиции и да измислува нови начини за вработените да бидат безбедни и здрави.
Синдикатите во Франција и во Германија ја предводат најновата колективна акција со координирани штрајкови во 18 големи складишта, со намера да ги нарушат испораките на клучните европски пазари. Моника ди Силвестре, претседателка на германскиот синдикален одбор за „Амазон“, рече дека работниците се особено загрижени поради начинот на кој компјутерите ја пресметуваат нивната продуктивност, со алгоритам што одредува цели, на пример број на пакети со кои би требало да се ракува во период од еден час.
„Работниците се под голем притисок со овој алгоритам. Не прави разлика меѓу работниците, без разлика дали се стари и послабо подвижни. Работниците остануваат будни со ноќи, мислејќи само на статистиката на својата профитабилност“, рече таа. Ди Силвестре ги повика европските политичари да ги зајакнат работничките права во целиот блок.
Во Велика Британија работниците поврзани со синдикатот планираат да штрајкуваат пред неколку складишта, вклучувајќи гп и тоа во Ковентри.
„Работниците на 'Амазон' во Ковентри се пренатрупани со работа, а недоволно се платени и доста им е“, рече Аманда Гиринг, организаторка во синдикатот, додавајќи дека ќе се соберат стотици што бараат зголемување на платите од 10,5 фунти на час на 15 фунти.
Во САД ќе се одржат протести и штрајкови во повеќе од десет града и пред станбените згради на Петта авенија во Њујорк, каде што има стан основачот на „Амазон“, Џеф Безос. Повеќе протести се планирани и за во Индија, додека во Јапонија членовите што неодамна основаа синдикат ќе штрајкуваат пред националното седиште на компанијата во Токио. Во Бангладеш работниците што се занимаваат со производство на облека во рамките на испораките од синџирот на „Амазон“ ќе маршираат во Дака и Читагонг. Ќе се штрајкува и во Даблин, Ирска, како и во Кејптаун, Јужноафриканска Република.
Некои синдикати изразија загриженост поради моменталната економска клима среде предупредувањето од „Амазон“ дека врвот на божиќната сезона можеби нема да биде прометен како вообичаено. Одлуката на компанијата да отпушти 10.000 работници дополнително ќе ги отежне преговорите за платите.
.webp){kind=icon}
