Додека посрамотениот коосновач на ФТХ (FTX), Сем Банкмен-Фрид, се подготвува да се бори против тоа да биде испратен во САД за да се соочи со кривична пријава, главниот дипломат на Бахамите предупредува дека битките за екстрадиција може да бидат долги и мачни.
Фред Мичел, министер за надворешни работи на островската држава, рече дека обидот за блокирање на отстранувањето од Бахамите може да трае со месеци или дури со години. Тој одби да зборува конкретно за Банкмен-Фрид, кој беше уапсен во понеделникот по барање од американските власти.
„Едно лице има право да се бори против екстрадицијата. Во Соединетите Американски Држави,екстрадициите исто така траат долго. Судовите понекогаш работат бавно“, рече Мичел во интервјуто во петокот.
Кога Банкмен-Фрид првпат се појави на суд, неговите адвокати посочија дека тој планира да се спротивстави на екстрадицијата. Американските обвинители во Менхетн во вторникот открија обвинение со осум точки, што вклучува обвиненија за измама преку електронски пат и заговор за извршување измама со хартии од вредност за наводна злоупотреба на милијарди долари во средства од клиенти на ФТХ.
Пред неговото апсење, во голем број интервјуа по колапсот на ФТХ минатиот месец, 30-годишникот негираше дека свесно извршил измама или го прекршил законот. Откако му беше одбиена кауцијата на судското појавување во вторникот, Банкмен-Фрид се наоѓа во озлогласениот поправен дом на периферијата на Насау, познат како Фокс Хил. Локалните медиуми објавија дека тој може да поднесе жалба на пресудата за кауција.
Властите во двете земји ја испитуваат вмешаноста на Банкмен-Фрид во колапсот на ФТХ минатиот месец. Седиштето на фирмата беше на Бахамите. Властите на Бахамите истражуваат каква улога можеби имале нивните поранешни врвни директори во повлекувањата на клиентите откако Владата ги замрзна средствата на ФТХ. Во интервјуата и говорите, официјалните лица ги негираа сугестиите дека Владата била премногу блиска со Банкмен-Фрид и другите високи функционери на ФТХ за правилно да ги регулира.
Во петокот министерот за надворешни работи Мичел негираше дека Бахамите биле лабави во својот надзор
„Лоши актери, или наводни лоши актери, може да се појават во која било земја. Не е проблем јурисдикцијата, туку актерите“, рече тој во петокот, наведувајќи ги американските скандали како оние со „Енрон“ (Enron Corp) и Берни Медоф. Мичел додаде дека американските и бахамските службеници за спроведување на законот целосно соработуваат за случајот „ФТХ“.
„Ова нема никакво влијание во однос на надворешните односи меѓу нашата земја и САД. Надлежните продолжуваат да соработуваат на сите нивоа“, рече тој.
.webp){kind=icon}
