text size
Поротата на судот во Калифорнија наложи компанијата „Авон“ (Avon Products Inc) да плати 10,3 милиони долари казна за обесштетување на жените што причината за добиениот рак ја гледаат во козметиката на „Авон“ што содржи талк (магнезиумов силикат). Ова е прв таков случај во кој компанијата загуби во судско рочиште во САД.
Поротата на Вишиот суд во Лос Анџелес, која вчера го казни „Авон“ поради криење на ризикот дека неговата козметика предизвикува рак, веќе ѝ додели на Рита Чепман 40 милиони долари како обесштетување, со што вкупниот износ во случајот надмина 50 милиони долари, покажуваат судските записи.
Наградата од 40 милиони долари е наменета за покривање на трошоците за лекови против болка на Чепман и за медицински трошоци поврзани со нејзината борба со ракот. Чепман тврди дека козметиката на „Авон“ содржи талк загаден со азбест од кој се разболела.
Компанијата, позната по своите продавачи од врата до врата, беше купена од „Натура“ (Natura Cosmeticos SA) во 2020 година. Емилија Леброн, портпаролка на „Натура“, не одговори веднаш на електронската пошта во која се бара коментар за одлуката за казнена отштета.
Од 2020 година Авон се соочи со речиси 130 тужби за талкот. Истата година компанијата соопшти дека го отстранува талкот од своите производи, кои сега во голема мера се продаваат надвор од САД.
Во случајот на Чепман поротниците заклучија дека менаџментот на „Авон“ знаел дека талкот во производите на компанијата претставува ризик од рак, но не ги предупредиле потрошувачите. Копијата од пресудата покажува дека тие откриле и дека директорите на „Авон“ дејствувале со „злоба, угнетување или измама“ при криењето на здравствените ризици на производите.
На 76-годишната Чепман, жителка на Скотсдејл во Аризона, која работела како експертка за меѓучовечки односи во трговски синџир, во 2021 година ѝ бил дијагностициран канцер.
Пресудата на „Авон“ доаѓа во момент кога судот проценува дали „Џонсон и Џонсон“ (Johnson & Johnson) може да продолжи да користи банкрот за својата единица, за да прекине илјадници судски случаи што ги поведоа жени што за својот рак прстот го вперуваат во талкот во легендарната детска пудра и другите производи.
Дејствувањето на „Авон“ во САД тоне во текот на последната година, бидејќи сè повеќе жени се преориентираа кон купување козметика преку интернет, наместо од личните продавачи. „Авон“ во голем дел од САД се откажува од својата работа.
„Натура“ во 2020 година го купи остатокот од 136 години стариот бизнис за две милијарди долари. Компанијата со седиште во Сао Паоло и натаму го прифаќа моделот од врата до врата, со исклучителна продажба од милион луѓе само во Бразил.
Мноштво од компаниите се откажаа од формулите на база на талк во последните три години, по бранот тужби поради предизвикување рак. Талкот се наоѓа на иста линија како и азбестот, кој истражувачите го означија како моќен предизвикувач на канцер. Се користи во козметиката и другите производи за впивање влага, спречувајќи стврднувања и додавајќи мекост.
.webp){kind=icon}
