Забавувањето на економијата не ги спречува многу богатите да купат „ролс ројс“ (Rolls-Royce Motor Cars Ltd).
„Не видовме никаков пад на нарачките овде во последните месеци. Јас сум внимателен оптимист за оваа година“, рече главниот извршен директор на компанијата Торстен Милер-Отвос, во разговор за телевизијата Блумберг. Тој додаде дека иако „Ролс Ројс“ не е имун на рецесијата, сепак глобалната дистрибуција за неговите клиенти донекаде го штити производителот на луксузни автомобили.
Bloomberg Mercury
Британската компанија бележи рекордна година, испорачувајќи повеќе од 6.000 возила во 2022 година. „Ролс Ројс“, во сопственост на германскиот гигант БМВ (BMW AG), планира да продава само возила на батерии до крајот на оваа деценија. Британскиот производител во октомври го покажа „спектер“ (Spectre), целосно електрично купе, со време на забрзување од нула до 100 километри на час за 4,4 секунди.
„Нарачките за ’спектер’, кој би требало да пристигне во четвртиот квартал, ги надминуваат нашите највисоки очекувања“, рече извршниот директор, додавајќи дека брендот привлекува нови клиенти, бидејќи се фокусира на возила на електричен погон.
„Целокупниот пазар на луксузни производи може малку да се олади оваа година, а прерано е да се предвиди како ќе се развива Кина, иако е охрабрувачки што се зголемуваат патувањата од и во оваа азиска земја“, напомена Милер-Отвос.
„Откако ќе заврши пандемијата во Кина, предвидувам повторно раст на нарачките оттаму на нашите модели. Остатокот од светот е доста стабилен“, рече тој.
Продажбата на „Ролс Ројс“ се зголеми за осум проценти минатата година, на 6.021 автомобил, бидејќи зголемената побарувачка во Америка го компензира падот во Кина, а клиентите трошат во просек околу 500.000 евра (537.100 долари) по возило. „’Кулинан’ (Cullinan), првото спортско теренско возило на марката, беше најпродаваниот модел на ’Ролс Ројс’, со учество од дури половина од вкупните испораки“, рече извршниот директор.
.webp){kind=icon}
