Втора година по ред, БМВ (BMW AG) продаде повеќе возила од конкурентот „Мерцедес бенц“ (Mercedes-Benz AG) бидејќи подобро ги менаџира проблемите со синџирот на снабдување што го попречуваат глобалното производство на автомобили.
Испораките на автомобили од баварскиот производител ширум светот паднаа за пет отсто, на 2,1 милиона минатата година, тесно победувајќи го „Мерцедес“, чии испораки паднаа за еден отсто, на 2,04 милионa. Иако и двете компании забележаа повисоки продажби во последните месеци од 2022 година, тие не беа во можност да го надоместат загубениот бизнис во првата половина од годината, кога недостигот на делови и војната во Украина го забавија производството.
Производителите на автомобили неодамна почнаа да се соочуваат со потешки препреки, како што се високите цени на енергијата и трошоците за задолжување. Акциите на „Тесла“ (Tesla) остро паднаа поради загриженоста за побарувачката во Кина, најголемиот светски пазар на автомобили, каде конкуренцијата од домашните производители BYD, Xpeng и Nio се интензивира.
„Мерцедес“ ја намали разликата во однос на ривалот / Bloomberg
И БМВ и „Мерцедес“ забележаа пад на продажбата во таа земја, бидејќи строгите заклучувања поради ковид ги држеа клиентите што подалеку од салоните. „Мерцедес“ минатата година силно ја намали цената на својот електричен седан EQS со цел да се репозиционира на пазарот.
Испораките на електрични возила беа светла точка за овие германски компании бидејќи пласираат нови модели на батерии и се стремат да се прилагодат на построгите регулативи во однос на емисиите.
Продажбата на електрични возила на БМВ, како што е седанот i4, се зголеми за повеќе од двојно на 215.755 автомобили. „Мерцедес“, исто така, повеќе од двојно ја зголеми продажбата на електрични возила, на 117.800 единици, и порача дека на целосно електричните и plug-in хибридните модели паѓаат 15 отсто од вкупните испораки минатата година.
„Ќе го продолжиме нашиот пат кон профитабилен раст во 2023 година“, рече во вторникот шефот за продажба на БМВ, Питер Нота. „Ќе задржиме јасен фокус на зголемување на електромобилноста“, додаде тој.
.webp){kind=icon}
Во моментов нема коментари за веста. Биди прв да коментира...