.webp){kind=icon}
ТТК Банка лани оствари добивка од 60,9 милиони денари (990.000 евра), што е зголемување за 36,4 проценти во однос на истиот период минатата година.
„Во услови на изразена економска и енергетска криза, динамичен пазар и силна конкуренција, водејќи се од основните принципи за сигурно и стабилно работење, ТТК Банка АД Скопје управуваше успешно со сите деловни аспекти од работењето што ја одразува одржливоста на деловен модел. Во ваков специфичен амбиент со многу предизвици, преку приспособлива стратегија на работење и преку посебна интерна посветеност, ТТК Банка АД Скопје реализираше позитивен финансиски резултат, темелен на здрава основа и во согласност со амбиентот“, коментираат од банката.
Оттаму информираат дека нето-приходите од камати претставуваат основна компонента во формирањето на вкупните приходи од работењето на банката. Остварените нето-приходи од камати во периодот од 1.1.2022 до 31.12.2022 година изнесуваат 249,1 милиони денари (4 милиони евра) и го надминуваат планираното ниво за овој период за 2,9 проценти.
Нето-приходите од провизии и надоместоци за услуги во тековниот период изнесуваат 199,1 милиони денари (3,2 милиони евра) и бележат зголемување за 2,6 проценти во однос на претходната година. Од банката велат дека тоа e резултат, во најголем дел, на зголемените приходи од провизии од услугите преку проширената мрежа банкомати и зголемениот обем на работењето со картичките, како и на поволните движења во понудата и реализацијата на услугите во областа на платниот промет од секторот стопанство. Во однос на планот за овој период, нето-приходите од провизии и надоместоци за услуги се остварени со 100,6 проценти.
Од ТТК Банка додаваат дека нето-приходите од курсни разлики бележат годишен раст од 26,9 проценти како резултат на зголемениот обем на тргувања на девизниот и на менувачкиот пазар и дека останатите приходи од работењето на банката се повисоки за 96,5 проценти во однос на минатата година, што главно се должи на поголемиот износ на реализирани приходи од капитална добивка од продажба на преземени средства.
Вкупните оперативни трошоци во анализираниот период се за 8,3 проценти повисоки во однос на истиот период минатата година најмногу заради зголемените материјални и административни трошоци и повисоките трошоци за плати.
