„ТТК Банка“ во првото тромесечје од годинава оствари добивка од 16,4 милиони денари(265.000 евра), што е намалување во однос на истиот период минатата година кога добивката на компанијата изнесувала 30,5 милиони денари(496.000 евра), покажува неревидираниот биланс на успех на банката објавен преку Македонската берза.
Од банката информираат дека нето-приходите од камати претставуваат основна компонента во формирањето на вкупните приходи и бележат пораст од 24,1 проценти во однос на истиот период од претходната година.
„Порастот во најголем дел се должи од зголемените каматни приходи од секторот банки и финансиски институции, како резултат на повисоките каматни стапки заради затегнувањето на монетарната политика на Централната банка, при остварен раст и на приходите од камати од секторите домаќинствата и претпријатијата. Нето-приходите од камати во однос на планот за овој период се остварени со 99 проценти“,соопшти банката.
Нето-приходите од провизии и надоместоци за услуги во тековниот период изнесуваат 42,9 милиони денари(697.000 евра).
„Најголем придонес во генерирањето на приходите од провизии имаат провизиите од домашниот платен промет, како и провизиите од картично работење, кои бележат пораст во најголем дел заради зголемените приходи од провизии од услугите реализирани преку проширената мрежа банкомати и зголемениот обем на работењето со картичките. Во однос на планот за првиот квартал од годината, нето-приходите од провизии се остварени со 103,2 проценти“, информираат од „ТТК Банка“.
Кај нето-приходите од курсни разлики, банката забележа годишен раст од 12,6 проценти како резултат на зголемениот обем на тргувања на девизниот и на менувачкиот пазар. Во однос на планот се остварени со 102,2 проценти.
Кога станува збор за очекувањата за наредниот период, од ТТК Банка велат дека затегнатите монетарни политики, потребни за справување со високата инфлација, војната во Украина, стресовите на финансискиот сектор и фрагментацијата на геоекономска основа, можат да имаат значајно неповолно влијание во тековната година.
Оттаму додаваат дека централните банки и понатаму го задржуваат ставот за затегната монетарна политика за претстојниот период, што сигнализира дека каматните стапки ќе останат на повисоко ниво подолг временски период.
„ММФ, во своите најнови проекции, очекува намалување на инфлацијата до стапката од 7 проценти во 2023 година и 4,9 проценти во 2024 година. Не се очекува враќање на инфлацијата во рамките на предвидените таргети пред 2025 година. Растот на глобалната економија во 2023 година се очекува да достигне 2,8 проценти, додека на среден рок, се очекува раст од 3 проценти, што претставува најниска среднорочна проекција во последните 30-тина години. Сегашната клима сугерира дека и следниот период ќе биде предизвикувачки и затоа банката и понатаму внимателно ќе ги анализира тековните макроекономски параметри, ќе ги следи мерките, активностите и предвидувањата на економските авторитети и на носителите на економските политики и на операторите, ќе ги усогласува интерните индикатори и ќе го приспособува нејзиното работење на пазарните услови, со фокус кон одржување на ликвидноста и долгорочната стабилност“, велат од банката.
Од ТТК Банка најавуваат дека ќе продолжат да дејствуваат проактивно, фокусирајќи се кон стабилно и профитабилно оперативно работење врз основа на реални и на предвидливи очекувања.
„Кредитната активност се очекува да продолжи да се реализира преку работата со населението и со малите и средни претпријатија, паралелно со севкупното закрепнување на економската активност и на зголемената побарувачка за кредити. Притоа, Банката ќе ги презема сите неопходни активности за одржување на квалитетот на портфолиото, развој на понудата на производи и изнаоѓање флексибилни решенија приспособени на потребите на клиентите - правни и физички лица кои се најзасегнати од кризата“, велат од банката.
.webp){kind=icon}
