„Епл“ (Apple Inc.), „Амазон“ (Amazon.com Inc.) и „Алфабет“ (Alphabet Inc), технолошките лидери со комбинирана пазарна вредност близу пет илјади милијарди долари, во четвртокот објавија резултати што покажаа дека економското забавување ја задушува побарувачката за електроника, е-трговија, облак-технологии и дигитално рекламирање - кои се основи на глобалната технолошка економија.
Продажбата на „Епл“ во празничниот квартал падна повеќе отколку што предвидуваа аналитичарите, погодена од слабите купувања „ајфони“ (iPhone) и „мекови“ (Mac). Приходите на „Амазон“ се потиснати поради слабата побарувачка за производи што се продаваат преку интернет и забавувањето на растот на неговиот некогашен просперитетен бизнис што им обезбедува на компаниите далечинско управување со компјутери. Резултатите на „Алфабет“ ги поткопаа процените на Волстрит откако клиентите ја намалија побарувачката за реклами што се појавуваат веднаш до резултатите од онлајн пребарувањата.
„Војната во Украина, инфлаторните притисоци, економската несигурност и макроекономското опкружување влијаеја врз лошото расположение на потрошувачите во 2022 година, бидејќи корисниците на паметни телефони поретко купуваа такви производи“, напиша Хармит Синг Валија, виш аналитичар во „Кантерпоинт рисрч“ (Counterpoint Research), во извештајот за „Епл“.
„Економската слабост, исто така, влијаеше на бизнис-побарувачката за реклами и облак-технологија“, вели Мандип Синг, технолошки лидер во „Блумберг интелиџенс“ (Bloomberg Intelligence). „Бавната економија беше најочигледна во ’Алфабет’ кога објави дека огласувачите се повлекуваат, повторувајќи го она што го кажаа другите продавачи на реклами“, рече тој во интервјуто. „Облакот се користи помалку, иако стапките на раст сè уште се повисоки“.
Акциите на сите три компании се лизнаа во тргувањето по работното време, при што „Амазон“ падна за 6,6 отсто, „Алфабет“ за 6,4 отсто и „Епл“ за 5,6 отсто. Фјучерсите на Nasdaq 100 исто така беа пониски, што укажува на можен пресврт на ситуацијата, која во четвртокот ја предводеше „Мета“ (Meta Platforms Inc), која најави намалување на трошоците и откуп на акции од десетици милијарди долари.
Секоја од големите технолошки компании што ги објавија резултатите во четвртокот, исто така, ги истакна мерките што ги презема за да се надмине падот. Извршниот директор на „Алфабет“, Сундар Пичаи, во голема мера се потпира на вештачката интелигенција како средство за подобрување на резултатите од пребарувањата и другите производи. Почнувајќи од оваа година, „Дип мајнд“ (DeepMind), оддел фокусиран на истражување за вештачка интелигенција, ќе биде вклучен во корпоративните трошоци на „Алфабет“. „Ова ќе покаже како технологијата се инкорпорира во други области, а не само во одделот ’Други облози’“, велат од компанијата.
„Возбуден сум поради чекорите што ќе ги преземеме на полето на вештачката интелигенција“, рече Пичаи во изјавата.
Дел од слабоста на „Епл“ во последниот квартал беше резултат на ограничувањата на синџирот на снабдување, особено во Кина, каде што заклучувањето поради ковид-19 го наруши производството и ги оддалечи потрошувачите од продавниците. Извршниот директор Тим Кук рече дека олеснувањето на мерките за коронавирусот во Кина, еден од најголемите пазари на „Епл“, ќе ги подобри резултатите.
Тим Кук / Bloomberg
„Отворањето започна во декември, кога видовме значителна промена во фреквентноста во нашите продавници во однос на ноември, што исто така влијаеше на побарувачката“, рече Кук на конференциска врска со аналитичарите. „Производството сега се врати на посакуваното ниво“, додаде тој.
Главниот извршен директор на „Амазон“, Енди Џеси, се фокусираше на напорите на компанијата да ги намали трошоците, поништувајќи го огромното зголемување на вработувањата и трошењето поттикнато од бумот на онлајн трговијата за време на пандемијата.
„Мислам дека веројатно приоритет број еден на кој работам со тимот е да ги намалиме нашите трошоци во нашата оперативна мрежа“, им рече Џеси на аналитичарите.
Главниот финансиски директор на „Алфабет“, Рут Порат, исто така им рече на инвеститорите дека компанијата годинава значително ќе го забави темпото на вработување. И двете компании најавија големи отпуштања во последните недели.
.webp){kind=icon}
