Лепилото ја кочи ИКЕА на патот кон еколошка неутралност

Климатскиот план што шведскиот производител на мебел ИКЕА планира да го постигне до 2030 година е составен од вообичаени тактики кои вклучуваат поттикнување на употребата на обновливи извори на енергија и намалување на употребата на материјали кои имаат негативно влијание врз климата. Но, меѓу предизвиците со кои се соочува ИКЕА е и еден неочекуван виновник за негативниот јаглероден отпечаток, имено лепилото. Токму лепилото е составен дел од најпопуларните производи на овој гигант, кој овозможува склопување на мебелот.

Лепилото што го користи ИКЕА за правење кревети, фотелји и нивни додатоци во моментов сочинува пет проценти од вкупниот јаглероден отпечаток на компанијата, според извештајот за одржливост за 2022 година објавен во средата.

„Транзицијата кон лепило од обновливи извори е клучен фактор за постигнување на нашата крајна климатска цел. Но, останува големиот предизвик со лепилата на биолошка основа, бидејќи не сите се компатибилни со нашите сегашни конвенционални лепила и технологија за нанесување. Ова значи дека фабриките ќе мора да се префрлат не само на органски лепила, тие ќе мора да ги заменат машините и другата технологија“, велат од ИКЕА.

Depositphotos

Компанијата која на светот му ги подари „били“ полиците за книги има амбициозен план да ги намали негативните ефекти од загадувањето на животната средина до крајот на оваа деценија. Од 2016 година, ИКЕА ги намали емисиите еквивалент на јаглерод диоксид за 12 отсто, вклучувајќи ги и минатогодишните пет отсто, се вели во нивниот извештај.

Покрај употребата на лепак на биолошка основа, ИКЕА забележува дека ќе мора да се справи со негативните емисии во синџирот на снабдување, производството, транспортот на мебел, како и приближно 460 продавници ширум светот. Во шведскиот гигант за мебел планираат да го зголемат уделот на обновливите извори на енергија во синџирот на снабдување и имаат за цел целосно да се префрлат на обновливи извори до крајот на деценијата. На пример, минатата година тие остварија 50 проценти од производството од обновливи извори.

Енергетската иницијатива на ИКЕА вклучува помагање на добавувачите со договори за купување електрична енергија и поволни заеми за финансирање на соларни панели и котли во фабриките. Програмата беше лансирана во 2021 година, а првично беше насочена кон поддршка на добавувачите во Кина, Индија и Полска, каде што употребата на јаглен во производството на електрична енергија е меѓу најголемите. Сега иницијативата ќе се прошири и во други земји, вклучувајќи ги Германија, Италија, Португалија, Романија, Турција и Виетнам.

„Насочувањето кон обновливи извори на енергија е еден од главните двигатели за намалување на негативните климатски емисии за нас“, рече Андреас Рангел Аренс, шеф за грижа за климата во групацијата „Интер ИКЕА“.

Во 2018 година, ИКЕА постави цели да користи само обновливи и рециклирани материјали во своите производи до 2030 година. Но, шведскиот гигант сè уште ја води битката за намалување на негативниот отпечаток на климата предизвикан од материјалите за мебелот, кои се зголемија за 11 отсто во последните шест години.