„Ауди“ ги намали прогнозите поради жестока конкуренција и економски притисоци

Групацијата „Ауди“ (Audi Group) на „Фолксваген“ (Volkswagen AG) ги намали годишните финансиски прогнози поради „жестока“ конкуренција и економски предизвици, вклучувајќи ги и тарифите во САД.

Подружницата, во чиј состав се брендовите „Ауди“, „Ламборгини“ (Lamborghini), „Бентли“ (Bentley) и „Дукати“ (Ducati), сега очекува оперативна маржа од 4 до 6 отсто, во споредба со претходната прогноза која достигнуваше до 7 отсто. Дополнителен притисок создаде и сестринската компанија „Порше“ (Porsche AG), која ги намали амбициите за електрични возила, соопшти „Ауди“ денеска.

„Ситуацијата останува многу предизвикувачка,“ изјави финансискиот директор Јирген Ритерсбергер, додавајќи дека марката оваа година очекува финансиски удар од 1,3 милијарди евра поради тарифите.

Производителот на луксузни автомобили, исто така, треба да најде решение за моделите што требаше да се произведуваат на заедничката платформа за електрични возила со „Порше“, чие развивање е одложено, рече тој.

Остварувањето на финансиските цели, според „Ауди“, ќе зависи и од обезбедувањето доволно полупроводници, поради нарушувањата во снабдувањето со чипови од „Нексперија“ (Nexperia). Компанијата предупреди дека производството е во ризик од застои, откако овој помалку познат производител на чипови од Холандија се најде во средиштето на спорот меѓу Западот и Кина.

Покрај повторните ризици во синџирите на снабдување, подружницата на „Фолксваген“ се обидува да го поедностави своето работење за да ги намали трошоците, додека паралелно работи на рекордна офанзива со нови модели. „Ауди“, која традиционално е еден од главните извори на профит за матичната компанија, е сериозно погодена од тарифите во САД и од падот на пазарниот удел во Кина.

Во третиот квартал, компанијата оствари оперативна маржа од 2 отсто и добивка од 280 милиони евра, во споредба со благо негативниот резултат минатата година, кога беа евидентирани трошоци поврзани со затворањето на фабриката во Брисел.

Финансискиот директор Ритерсбергер изјави дека компанијата сè уште разгледува повеќе опции за почеток на производство на автомобили во САД, додавајќи дека одлуката ќе биде донесена до крајот на годината.