Што очекуваат БМВ, „Порше“ и „Фолксваген“ од новата германска влада

Германската автомобилска индустрија е во криза. Продажбата е во пад, а производствените трошоци растат. „Фолксваген“ (Volkswagen AG), „Мерцедес“ (Mercedes-Benz Group AG) и стотици производители на делови заостануваат во преминот кон електрични возила.

Покрај тоа, заканата од дополнителни царини при увозот на нивните возила од страна на американскиот претседател Доналд Трамп не остава надеж. Сите очи на германската автомобилска индустрија беа вперени во резултатите од изборите, но и во тоа што следува по нив.

Влогот никогаш не бил поголем. Најголемата европска економија се наоѓа среде индустриски пад, предизвикан од подемот на напредното кинеско производство и низа кризи – од пандемијата до прекинот на снабдувањето со евтин руски гас. Без нов поттик, Германија ризикува да изгуби десетици илјади работни места во производството во однос на земјите со пониски трошоци, кои агресивно лобираат за инвестиции.

„Потребен ни е економски пресврт“, рече Хилдегард Милер, претседателка на германското автомобилско здружение ВДА (VDA). Таа додаде дека следната влада мора да ја намали бирократијата и да го поттикне растот за Германија повторно да стане конкурентна.

Перспективата на германската автомобилска индустрија, која сочинува околу пет проценти од економијата на државата и вработува скоро 780.000 луѓе, е мрачна. Производителите на автомобили сега ги намалуваат трошоците, ги преуредуваат производствените портфолија и го менуваат менаџментот, откако претрпеа сериозен удар поради сè посилната конкуренција од Кина и опаѓачката побарувачка за електрични возила во Европа. Расположението никогаш не било полошо.

Сепак, германските политички партии не претставија посериозни планови за опоравување на автомобилската индустрија. Ова се клучните прашања кои ги мачат автомобилските раководители.

Трговска војна

Приближно три од четири автомобили произведени во Германија се извезуваат во странство, што ја прави автомобилската индустрија особено ранлива на сè поголемите трговски бариери. Одлуката на Доналд Трамп да воведе царини од 25 проценти на увозот на челик и алуминиум, почнувајќи од следниот месец, дополнително ги зголеми тензиите кои се градеа откако се врати во Белата куќа. Американскиот претседател исто така се закани со санкции на Канада и Мексико – каде што „Фолксваген“, БМВ и „Мерцедес“ имаат фабрики – како и на Европската унија. Царините на автомобилите би можеле да достигнат околу 25 проценти, изјави Трамп во вторникот минатата недела.

 

Германските авто-магнати повеќепати ги критикуваа царините, вклучувајќи ги и царините на ЕУ насочени кон кинеските електрични автомобили. Извршниот директор на БМВ, Оливер Ципсе, претходоно овој месец ја нарече слободната трговија „еден од клучните двигатели на растот и напредокот“.

Силната побарувачка за големи спортски теренци во САД и побавниот премин кон електрични возила го прават тој пазар особено профитабилен за БМВ, „Порше“ и „Мерцедес“, кои таму продаваат модели со мотори со внатрешно согорување на кои имаат високи профити. Германските производители на автомобили работат со неколку фабрики во САД, каде што произведуваат возила како за домашните купувачи, така и за извоз. Тоа значи дека последиците од трговскиот конфликт би можеле да станат уште посериозни ако Европа воведе контрамерки – сценарио кое станува сè поверојатно.

Американскиот пазар е важен за БМВ, „Порше“ и „Мерцедес“ поради големата побарувачка за големи теренци Bloomberg

 

„Европа ќе возврати“, рече Бенедикт Лоу, стратег за акции во БНП (BNP Paribas), за телевизијата „Блумберг“ минатата недела, додавајќи дека очекува преговорите меѓу Брисел и Вашингтон да потраат.

Поранешниот канцелар Олаф Шолц навести дека е подготвен да го поддржи европскиот одговор. Менаџментот на автомобилската индустрија ќе ги следи мерките на неговиот наследник, Фридрих Мерц, за да видат дали ќе заземе помирлив тон. Мерц, поранешен претседател на надзорниот одбор на германската единица на „Блекрок“ (Blackrock Inc.), изрази пооптимистички став кон Трамп, нарекувајќи го „многу предвидлив лидер“ со јасна агенда.

Високи трошоци

Предвидливоста е клучна тема за лидерите од оваа индустрија, особено кога станува збор за производствените трошоци. Нивната главна грижа се цените на енергијата, кои скокнаа откако руската инвазија на Украина го прекина германското снабдување со евтин гас од гасоводот. Германија сè уште многу зависи од фосилните горива за да ја одржи стабилноста на снабдувањето со електрична енергија, особено во текот на зимата.

Цените на струјата во Германија се приближно три пати повисоки отколку во САД и Кина и околу 40 проценти повисоки отколку во соседна Франција, која се потпира на десетици нуклеарни реактори за пристапна и стабилна енергија. Сите главни политички партии пред изборите ветија дека ќе ги намалат трошоците за енергија, но не се согласија околу начинот. Додека партијата на Шолц поддржува зголемување на обновливите извори на енергија и ограничување на мрежните тарифи, Мерц ја изнесе идејата за преиспитување на одлуката Германија да се откаже од нуклеарната енергија.

Power Premium/Bloomberg

„Германија е една од последните вистински индустријализирани нации во Европа, со компании како 'Салцгитер' (Salzgitter) и БАСФ (BASF) кои обезбедуваат челик и хемикалии за германската автомобилска индустрија“, вели Матијас Шмит, независен аналитичар на автомобилската индустрија од околината на Хамбург. „Ниските трошоци за енергија или барем стабилноста на цените се од суштинско значење“.

Опасна зависност од Кина

Кина е најголемиот поединечен пазар за повеќето германски производители на автомобили, кои таму остваруваат значителен дел од своите приходи и профити. Сепак, тие се соочуваат со сè поголема конкуренција и послаба потрошувачка на луксузни возила, додека беснее ценовната војна на пазарот на електрични возила, која ја започнаа „Тесла“ (Tesla Inc.) и локалните производители како БЈД (BYD Co).

Владата на Олаф Шолц се обиде да ги ресетира односите со Кина и ги повика германските компании да ја намалат изложеноста на тој пазар, откако војната во Украина покажа колку може да биде опасно премногу да се потпираат на Русија за гас. Мерц минатиот месец издаде слично предупредување, нарекувајќи ги инвестициите во Кина „голем ризик“.

Продавница на „Порше“ во Шангај Фото: Qilai Shen/Bloomberg

Но, германските производители на автомобили не се повлекуваат. Тие ги зголемуваат инвестициите и се потпираат на партнерства со локалните компании за да го повратат пазарниот удел. „Фолскваген“, кој во Кина работи со повеќе од триесет фабрики, планира да ја зголеми продажбата на автомобили во таа земја на околу четири милиони годишно до 2030 година, во споредба со 2,93 милиони минатата година. БМВ планира да вложи дополнителни 20 милијарди јуани (2,7 милијарди долари) во својата производствена база во Шенјанг за да ја забрза локалната продукција на електрични возила.

Забавување на пазарот на ЕВ

Германија минатата година ја загуби титулата најголем пазар на електрични возила во Европа од Велика Британија, откако продажбата нагло падна кога владата на Шолц ненадејно ги укина субвенциите. Главните производители на автомобили, вклучувајќи ги „Фолксваген“ и „Мерцедес“, оттогаш ги ревидираа своите планови за електрификација, наведувајќи ја слабата побарувачка. „Порше“ очекува оваа година да претрпи загуба од 800 милиони евра поради проширувањето на портфолиото на модели со мотори со внатрешно согорување и плагин хибриди. Предизвиците во преминот на електрични возила скапо го чинеа тој луксузен бренд во Кина, каде што испораките паднаа за 28 проценти минатата година.

Продажбата на ЕВ стагнира во Европа Bloomberg

 

„Стратешката промена на 'Порше' испраќа јасна порака дека германските автомобили со бензински мотори можеби ќе добијат подолг животен век, а очекувам владата предводена од Мерц да го поддржи тој правец“, рече Шмит.

Конзервативците на Мерц сакаат да ја продолжат продажбата на нови возила со мотори со внатрешно согорување и по планираната забрана на ЕУ во 2035 година, додека Шолц повика на даночни олеснувања за електрични возила за да се оживее продажбата на батериски автомобили. Двете страни тврдеа дека производителите на автомобили не треба да бидат казнети со високи казни поради неисполнување на построгите цели на ЕУ за емисии оваа година.

Долгорочно паркирање или промена на курсот за германската автомобилска индустрија? Фото: Krisztian Bocsi/Bloomberg

Бирократија

Илон Маск, кој предизвика бура на германската политичка сцена поддржувајќи ја крајно десничарската партија АфД (AfD), е еден од најгласните критичари на германската бирократија, откако регулативите ја одложија изградбата на фабриката на „Тесла“ близу Берлин. Тој не е сам: ВДА го повика Берлин да го забрза процесот на издавање дозволи, да ги намали непотребните административни барања и да осигура дека Брисел нема да наметне дополнителни бирократски пречки кои го задушуваат растот.

Сите главни партии ветија дека ќе ја намалат бирократијата. Мерц води кампања со програма која вклучува пониски даноци, ограничени регулативи и само основни социјални бенефиции. Сепак, неговите конзервативци се неодлучни кога станува збор за значително ублажување на ограничувањата на јавната потрошувачка, познати како „кочница на долгот“, за која повеќето аналитичари сметаат дека е клучна за враќање на земјата на патот на растот.

„Германија треба да добие поттик, но прашањето е дали ќе има доволно пари во буџетот за нова помош. Не сум сигурен“, заклучи Шмит.