.webp){kind=icon}
„Викторијас сикрет“ (Victoria’s Secret & Co) промовира градник со елементи што ќе се рециклираат во нови градници, што е чекор напред во решавање на проблемот со текстилниот отпад од долната облека, кој најчесто се фрла во ѓубре на крајот од неговиот век на употреба.
Производот, наречен „форевр бра“ (Forever Bra), има влошки направени од ткаенина од растително потекло, која е полесна за рециклирање отколку синтетиката, како полиестерот.
Клиентите на „Викторијас сикрет“ може да ги вратат градниците во која било продавница во САД, а влошките ќе бидат отстранети за рециклирање. Компанијата работи со два партнера, кои ќе помогнат да се соберат, сортираат и расклопат градниците пред да се испратат во „Унифи“, компанијата за иновации и рециклирање текстил.
Градниците што сè уште се во добра состојба ќе се земат предвид за донација наместо за рециклирање. Иако производот е чекор напред за брендот, кога станува збор за создавање поодржлива долна облека, постојат елементи на градникот „форевр бра“, вклучувајќи жици и спојки, што не можат да се рециклираат. Тие парчиња, кои се од суштинско значење за структурата на производот и се првенствено направени од ситни парчиња пластика и метал, остануваат најтешкиот аспект за создавање градници што се поеколошки. Во случајот со градникот „форевр бра“, тие жици и спојки ќе се расклопат од градниците пред да се рециклираат и ќе се испратат во системот за производство на енергија од отпад, каде што материјалите се согоруваат за да се создаде пареа за производство на електрична енергија.
„Викторијас сикрет“ соопшти дека иако влошките се единствениот елемент за рециклирање на градникот „форевр бра“, сепак компанијата работи на иновации за други материјали.
