Проектираната заработка на „Ибеј“ (eBay) за тековниот квартал не ги убеди инвеститорите во ефективноста на напорите на компанијата за заживување на онлајн продажбата. Акциите паднаа во претпазарното тргување во четвртокот.
За периодот што завршува во март се очекува приходите да бидат меѓу 2,31 и 2,36 милијарди евра или приближно исто како и минатата година. Во четвртиот квартал продажбата паднала за 3,9 отсто или на 2,37 милијарди евра. Компанијата за е-трговија вели дека имала 134 милиони активни клиенти заклучно со 31 декември, што е пад на фреквентноста од девет отсто во споредба со претходната година, односно забележан пад веќе седми квартал по ред.
„'Ибеј' се врати на нивоата пред пандемијата, губи клиенти и ја намалува продажбата“, вели Брајан Јарброу, аналитичар во „Едвард Џонс“ (Edward Jones). Тој додаде дека инвеститорите се вознемирени од прашањето дали менаџерите се доволно кадарни да го променат тоа. „Освен ако не барате необичен и старински производ, повеќето купувачи заборавија на 'Ибеј'. Само за тоа не се зборува на начинот на кој се зборува за 'Волмарт', 'Таргет' и 'Амазон'“, рече Јарброу.
Извршниот директор на „Ибеј“, Џејми Ианоне, се обидува да ги намали трошоците за да се усогласи со падот на продажбата што се намали по експанзијата забележана за време на пандемијата на ковид-19. На почетокот на месецов, „Ибеј“ објави отпуштање на околу 500 вработени или четири отсто од својата работна сила.
Компанијата има цел да продава повеќе луксузни производи, како часовници, за да ги зголеми приходите, а истовремено да нуди и обновени предмети за да привлече купувачи што внимаваат на цените. Во обид да привлече колекционери, „Ибеј“ нуди услуга за трговија и проверка на автентичноста на колекционерски фигурини и други предмети и гради климатизирани трезори за нивно складирање.
Од седиштето на компанијата во Сан Хозе, Калифорнија, во средата објавија дека приходите од рекламирање на нивниот сајт во последниот квартал пораснале за 19 отсто, односно за 260 милиони евра. Од друга страна, бруто-обемот на стоки, или вкупната вредност на стоките продадени од „Ибеј“, во празничниот квартал падна за 12 отсто на 17,1 милијарди евра, но сепак ја надмина просечната процена на аналитичарите.
Акциите на „Ибеј“ паднаа за околу пет отсто во претпазарното тргување во четвртокот, во 10.30 часот по лондонско време, откако во средата во Њујорк се тргуваа за 45,13 евра по завршувањето на тргувањето. Акциите се зголемија за околу 15 проценти досега оваа година, по пријавениот пад од 38 проценти во 2022 година.
На почетокот на февруари и „Амазон“ објави финансиски загуби веќе петти квартал по ред поради забавувањето на онлајн продажбата. Најголемата светска компанија за е-трговија отпушта 18.000 вработени, по ненадејното проширување за време на пандемијата, од каде што и дојде вишокот на вработени.
.webp){kind=icon}
