Откако ги објавија најголемите кругови на отпуштања во нивната историја, големите американски технолошки компании сега сфатија колку е тешко да се намали бројот на вработени во Европа.
Во САД компаниите можат да најават масовни отпуштања и на тој начин да отпуштат стотици или дури илјадници работници во рок од неколку месеци, како што направија многумина. Меѓутоа во Европа масовните отпуштања меѓу технолошките компании се стопирани поради заштитата од областа на правото што го прави практично невозможно отпуштањето луѓе во некои земји без претходна консултација со групите што ги штитат интересите на вработените.
Ова остави илјадници технолошки работници во неизвесност, кои сега не се сигурни дали ќе бидат засегнати од преговорите, кои би можеле да траат неодредено долго.
Во Франција, „Алфабет“ (Alphabet), матичната компанија на „Гугл“ (Google), во моментов преговара за намалување на бројот на вработени преку доброволни заминувања, нудејќи пакети за испратнина за кои се надева дека се доволно дарежливи за да ги мотивираат работниците да си заминат, велат лица запознаени со ова прашање, барајќи да останат анонимни бидејќи информациите не се од јавен карактер. „’Амазон’ (Amazon) се обиде да принуди некои високи менаџери да дадат оставка нудејќи им до една година плата и им даде отсуство на вработените што заминуваат за да може нивните акции да се исплаќаат како бонуси“, вели извор запознаен со ситуацијата.
И во Франција и во Германија, каде што законите за работни односи се меѓу најсилните во ЕУ, „Гугл“ во моментов преговара со работните совети - специјални групи во компаниите каде што избрани претставници на вработените преговараат со раководството за работни прашања, според лице запознаено со случувањата. Според законот, компаниите се обврзани да преговараат со овие совети пред да спроведат отпуштања - што понекогаш е долг процес, кој вклучува собирање информации, дебати и можност за компензација.
Поради ваквите барања, како што вели изворот, филијалите на „Гугл“ во Германија и во Франција ќе бидат некои од последните локации што ќе бидат погодени од кратењата, доколку воопшто има.
Кога побаравме коментар, од „Гугл“ потврдија дека преговорите се во тек и додадоа дека не планираат да спроведат отпуштања во Романија, Грција или Австрија.
„Работевме внимателно и поединечно за секоја земја каде што се спроведуваат кратења за целосно усогласување со локалните законски барања, кои варираат во зависност од локацијата, а се сложени и бараат време“, рече портпаролот на „Гугл“ како одговор на прашањата од „Блумберг“.
Во Париз, каде што „Гугл“ има околу 1.600 вработени, работничкиот совет преговара со компанијата за тоа колку вработени - и од кои позиции - ќе бидат вклучени во планот за доброволно колективно заминување. Луѓе запознаени со процесот велат дека може да поминат неколку недели пред да се најде решение и дека во меѓувреме работите ќе продолжат како и обично. Според вработен, кој побарал да остане анонимен, раководството јасно ставило до знаење дека никој нема да биде принуден да замине.
Наспроти тоа, во Британија, каде што заштитата на трудот не е толку строга, се проценува дека 500 од 8.000 вработени на „Гугл“ ќе мора да си заминат, според претставникот на „Јунајт јунион“ (Unite Union), Метју Вејли - стапката на отпуштање од шест проценти е во согласност со глобалната цел на компанијата. Дискусиите со работниот совет ќе резултираат со доверливи испратнини, но за бројот на заминувања не се преговара. „Тие се обидуваат да го исполнат законскиот минимум“, рече Вејли, коментирајќи го тековниот преговарачки процес.
Седиштето на „Гугл“ во Париз
Bloomberg
Истото тоа важи и за Даблин, каде што синдикатите велат дека „Гугл“ планира да укине 240 работни места, и во Цирих, каде што синдикатите предвидуваат околу 200 отпуштања.
За да ги забрзаат преговорите, синдикатите неодамна формираа работен совет на „Гугл“ за земјите од ЕУ, во кој се вклучени и Велика Британија и Швајцарија. Се очекува да профункционира за околу шест месеци и да биде моќен колективен глас во идните преговори. Според Вејли, ова претставува „голема промена“, бидејќи компанијата ќе мора однапред да ги извести вработените за планираните реорганизации. Овој европски работнички совет ќе се состои од претставници што се вработени во „Гугл“ и ќе имаат четиригодишен мандат. Членовите на советот ќе имаат врска со раководството на „Гугл“ и ќе бидат со седиште во Даблин, покажуваат документите.
Иако различниот третман не создаде несогласувања меѓу вработените во „Гугл“ низ светот, „луѓето сфатија дека работите се прават поинаку во САД во споредба со Франција и Германија“, рече Парул Каул, извршен претседател на Синдикатот на работниците на „Алфабет“ и софтверски инженер во „Гугл“ во Њујорк.
„Инспиративно за луѓето во САД е да видат дека работите се поинакви на друго место - тоа е нацрт за она за што луѓето можат да се борат“, додаваат тие.
Повеќе од 170.000 технолошки работници со полно работно време се вработени во Европа од страна на „Амазон“, „Алфабет“ и „Мета“ (Meta), а софтверските инженери често заработуваат плати што се половина од платите на нивните колеги од САД.
Во „Амазон“ во Франција, која има околу 1.500 вработени во канцеларијата во Париз, на некои високи менаџери со меѓу пет и осум години работно искуство им е понуден износ во висина од платата за една година за да заминат, според лице запознаено со ова прашање. Изворот вели дека на вработените во заминување им било дозволено да останат на т.н. „градинарско отсуство“ до мај, кога „Амазон“ ќе ги подели акциите, кои потоа се исплаќаат како бонуси.
Центарот на „Амазон“ за пратки во Франција
Bloomberg
„Претходните години на вработените им се нудеше помалку од висината на месечен надоместок по година работа“, вели еден од нив.
Во германската филијала на „Амазон“, упатено лице вели дека компанијата почнала да отпушта луѓе што сè уште се на пробен период и нуди предлози за доброволно заминување.
Во Луксембург на вработените во „Амазон“ што заминуваат им била понудена месечна плата по години од стаж, со дополнителна плата утврдена со националните закони, според изворот. Понудите за отпуштање започнале кон средината на минатиот месец, додава лицето, а луѓето ќе заминат на 1 април или 1 јуни, во зависност од тоа дали се одлучиле за двомесечен период за интерно барање работа.
Портпаролот на „Амазон“ одби да коментира за конкретни случаи. Извршниот директор на „Амазон“, Енди Џеси, во јануари изјави дека компанијата ќе комуницира со засегнатите вработени или, каде што е можно, со претставничките тела на вработените.
.webp){kind=icon}