„Опен еј-ај“ планира да се прошири во Јапонија

Сем Алтман, коосновачот и извршен директор на „Опен еј-ај“ (OpenAI), рече дека организацијата размислува да отвори канцеларија во Јапонија и да ги прошири услугите на јапонски јазик, по состанокот со премиерот Фумио Кишида.

„Се надеваме дека ќе останеме долго време и ќе соработуваме со прекрасни таленти за да создадеме нешто големо за јапонскиот народ“, изјави Алтман за новинарите во Токио во понеделникот. „Навистина е неверојатно да се види усвојувањето на оваа технологија во Јапонија“.

„Опен еј-ај“ предизвика лудило од интерес за технологиите за вештачка интелигенција откако во ноември ја претстави својата услуга ЧетГПТ. „Мајкрософт“ (Microsoft) се согласи да инвестира 10 милијарди долари во компанијата и ја интегрира технологијата во својот пребарувач Бинг (Bing). „Гугл“ (Google), водечкиот веб-пребарувач во светот, одговори со свои интеграции на вештачка интелигенција.

Алтман истакна дека разговарал со Кишида за потенцијалот на технологијата и како да се ублажат нејзините недостатоци. Тие исто така разговарале за тоа како да се внимава на ризиците и како да се направи вештачката интелигенција „колку што може подобра за луѓето“.

Алтман кажа дека „Опен еј-ај“ ќе работи да ги направи своите модели на јапонски јазик што е можно поквалитетни и адекватни за јапонската култура.

„Ќе се вратиме наскоро“, нагласи тој.