Повторно работи легендарната продавница на „Тифани“ на Петтата авенија

Новиот изглед на продавницата на „Тифани“ (Tiffany & Co.) на Петтата авенија во Њујорк, која сега го носи името „Лендмарк“ (Landmark), ја обележува новата ера за легендарниот американски луксузен бренд, кој постои во рамките на групацијата ЛВМХ (LVMH) и претставува најголема инвестиција во малопродажен објект што овој гигант ја направил кога било.

Во предвечерјето на свеченото отворање, закажано на 28 април, директорот Ентони Ледру за „Блумберг“ откри детали од новиот концепт и амбиции да се задоволат потребите на најелитните клиенти.

Фото: Depositphotos

 

 

Новиот ентериер на продавницата изгледа феноменално. Кој ви е омилен дел од „Лендмарк“?

Всушност имам два. Првиот е приземјето: има нешто многу великодушно во него. И нешто многу американско. Распоредот е ист како и тој што го имавме од 1940 година, многу лесно пристапен за сите. Но кога ќе влезете, сега тука има и светилник, што придонесува за модерниот изглед на просторот и дава поголема светлина. И на секоја страна (на дигитални екрани) се најпознатите видици на Њујорк и Централ Парк.

А, втор омилен дел ми е пентхаусот на 10-от кат, кој е сосема поинаков и суперексклузивен. Можеби е наменет за вкупно еден, двајца, тројца или ниту еден ВИП-клиент дневно.

Во јануари Бернард Арнолт сподели некои резултати и изјави дека привремената продавница носи 200 милиони долари годишна продажба. Исто така изјави дека очекува новата да носи 400 милиони долари. Имате ли некоја временска рамка за остварување на оваа цел?

Сосема очекувано, секогаш одиме кон највисоките цели. Не правите ваква инвестиција, а да не очекувате одреден повратен ефект. Но опсесијата е всушност директно поврзана со посакуваноста на брендот. Тоа што сакаме да го креираме е сон. Се обидуваме да му додадеме автентично искуство и одредена културна димензија на проектот.

Некогаш тоа беше најголемата продавница за накит во светот. Тоа е во ред. Но мислам дека во 2023 година треба многу повеќе да поставиме на масата. Посакуваноста ќе ја создадат трите димензии што ги споменав. А, тоа се претвора во трансакции.

Тоа е многу поголема продавница отколку што беше претходно. Навистина се потребни часови за да се обиколи. Тоа е причината зошто креиравме различно искуство на секој кат. Естетскиот пристап од нашето минато, кое веројатно имало смисла во 1920-тите години, беше доследноста. Не верувам дека порано сте можеле да сфатите на кој кат сте. Сè беше исто.

Денес е многу поинаку. Се изненадувате на секој нареден кат. Мислам дека некои луѓе може да поминат половина ден тука, да појадуваат, ручаат или вечераат во „Блу бокс кафе“ (Blue Box Cafe) на Даниел Булуд, кое е сместено во рамките на продавницата.

Во минатото сте се потпирале на тоа дека само оваа продавница остварува 10 проценти од вкупната продажба на „Тифани“. Мислите дека ќе се зголеми тој процент на удел? Или можеби ќе се намали поради отворањето други продавници низ светот?

Оваа продавница имаше извонредна тежина во минатото бидејќи „Тифани“ беше екстремно насочен кон Северна Америка, можеби и премногу. Стратегијата на брендот сега е ширење, особено во Европа. Имаме потенцијал на пазарите каде што поголемиот дел наши конкурентни се во доцна фаза. Па, сепак, кога размислуваме за „Тифани“, денес всушност немаме водечка продавница во Париз.

Ќе изградите ли една?

Постојат дискусии за тоа. Сигурно дека ни требаат една или две таму. Потенцијално ни треба една поинтимна околу плоштадот „Вандом“ и една поголема околу Елисејските полиња, која би била еквивалент на оваа од Петтата авенија. Веќе сме таму, но тоа може да биде многу подобро.

Отвораме една продавница во Милано, на Виа Монте Наполеоне. Сега сме веднаш зад Дуомо. Постои огромен потенцијал. Исто така ги реновираме и нашите продавници во Лондон. Европа ќе биде голем фокус во натамошното дејствување.

Доста е извонредно тоа што се случува на Блискиот Исток. Од повторното отворање на продавницата во „Дубаи мол“, пред една недела, резултатот е навистина импресивен. Кога ја гледаме Југоисточна Азија, тоа е ист пристап. И секако дека имаме потенцијал како што имаат и другите во Кина. Нашата водечка продавница во Токио повторно се отвора во јули.

Дали можеме и натаму да растеме на американскиот континент? Верувам дека потенцијалот е еднакво голем. Не инвестиравме многу во последните десет години во смисла на иновации. Тоа за нас претставува најголема можност.

Може ли да ни кажете колку чинеше реновирањето на „Лендмарк“?

Не, не можам, но тоа е најголемата инвестиција на ЛВМХ во една продавница досега. Мислам дека тоа многу ви кажува.

Достигнува ли една милијарда долари?

Не. Не достигнува милијарда.

Ќе има ли нова линија производи или нови категории што се поврзани со концептот на продавницата?

Имаме неколку ексклузивни, лимитирани серии на прекрасни часовници. Часовниците со накит ќе бидат во фокусот повеќе од сè друго. Се планира линијата „Тифани 57“ (Tiffany 57), која ќе чини околу 500.000 долари. Потоа го имаме часовникот „јунион сквер“ (Union Square), именуван по продавницата од 19 век.

Значи, ќе ги има овие лимитирани изданија, плус некои нови модели на часовници во рамките на колекцијата „Шлумбергер“ (Schlumberger), именувана по дизајнерот на „Тифани“ од 20 век. Веруваме дека може да направиме нешто многу префинето и навистина врвно. Тие часовници ќе чинат околу сто илјади долари. Поентата е да се усогласат работата со часовници и работата со накит.

Откако ЛВМХ го презеде „Тифани“, соработувавте со брендовите за спортска облека „Суприм“ (Supreme) и „Најк“ (Nike). Некои од вашите европски конкуренти не би се впуштиле во таков вид соработка. Мислите дека тоа е ризично?

Ризично е ако не ризикувате. На една страна ги имате европските брендови, кои главно се фокусираа на наследството и мислам дека тоа има смисла за нив. Потоа имате модни марки што главно се фокусираат на модерното. Веруваме дека сме мешавина од тие два света. Кога ќе го погледнете „Тифани“, тоа е начин на кој работиме веќе 186 години. Од една страна тоа се „Дајмонд кингс“ (Diamond Kings), „Шлумбергер“, Белата куќа. Тоа е дел од нашето наследство. Од друга страна, „Тифани“ е дел и од поп-културата. Лансиравме концепт на дизајнери со кои соработуваме интерно во куќата: Пикасо, Перети. Тоа навистина е дел од нашата ДНК. Кога нè критикуваат веројатно тоа е добар знак. Кога го споменувате „Најк“, тоа се всушност два легендарни бренда заедно.

Во продавницата постојат голем број дела од современата уметност во сините нијанси на „Тифани“, дела на уметници како Баскијат и Даниел Аршам. Минатата година трговецот со уметнички дела Лари Гагосијан постави рекорд на аукција за дело на американски уметник, купувајќи го делото „Мерилин во зелено-сино“ (ShotSage Blue Marilyn, 1964) на Енди Ворхол за 195 милиони долари за непознат нарачател. Дали кога ќе се отвори продавницата ќе го видиме ова дело во неа?

Немам коментар.

Дали „Тифани“ се соочува со намалена побарувачка, особено во Америка?

Очигледно е дека целиот свет забави. Имаше неколку потреси во претходните 12 месеци. Но и натаму сме во добра форма. Веруваме во тоа дека инвестициите на кои работиме се долгорочни. Се надеваме дека „Лендмарк“ во следните 50 или 100 години ќе враќа на ниво на инвестицијата. Во Америка ќе имаме подеми и падови. Веќе се случи тоа во 2001 и 2008 година. Добрата вест е што во Америка секогаш многу брзо се враќате.

Може да ни кажете нешто за ВИП-услугите во „Лендмарк“?

Тоа е голема промена во однос на претходниот концепт, бидејќи претходно имавме многу малку приватен простор. Сега имаме дарежлив ВИП-простор, вклучувајќи и пентхаус. Просторот има речиси 2.500 квадратни метри и го нарекуваме „дијамант на покрив“.

Се чини дека за ЛВМХ само небото е граница кога станува збор за инвестирање во брендот.

Мислам дека има голема разлика меѓу тоа да се биде независен и да се котира на берза. Бев во „Тифани“ уште пред аквизицијата, така што точно знам што беше можно, а што не.

Со ЛВМХ ќе имаме средства и начини да издвојуваме за остварување на нашите амбиции. Постои тој поглед на долги патеки и долгорочно инвестирање. Со „Лендмарк“ ќе видите трансформација во малопродажбата што ќе се случи во следните 24 месеци. Кога ги имате овие три елементи, тоа е промена во играта: имате поголема продажба, имате поквалитетен промет и имате посреќни клиенти, кои се поврзуваат со брендот и се задржуваат подолго.