Висок старт на Комерцијална банка: Профит од 16,9 милиони евра за три месеци

Комерцијална банка во првите три месеци од годинава оствари добивка од 16,9 милиони евра, што е зголемување од 98,9 проценти во однос на истиот период минатата година, кога банката имала добивка од 8,6 милиони евра, покажува неревидираниот биланс на успех на банката објавен преку Македонската берза.

„Планираната бруто-добивка за првиот квартал од годинава е остварена со 136,4 проценти. Притоа, остварената добивка пред исправка на вредност, која претставува показател за оперативната способност на банката да ги покрива расходите од работењето, е за 67,9 проценти поголема во однос на истиот период минатата година. Зголемувањето на добивката пред исправка на вредност главно произлегува од зголемувањето на приходите од редовно работење, односно од нето-приходите од камати, кои бележат значително зголемување, што се должи на континуираниот пораст на основната каматна стапка на Народната банка и на каматните стапки на странските финансиски пазари, во комбинација со структурата на активата на банката“, информираат од Комерцијална банка.

Оттаму додаваат дека зголемувањето на каматните стапки е резултат на напорите за намалување на инфлацијата на светско ниво.

„Позитивниот резултат од работењето банката го оствари во услови на зголемена неизвесност на пазарите, сѐ уште висока инфлација, која забележа мало забавување, како и натамошно затегнување на монетарната политика“, соопшти банката.

Што ги билда приходите?

Вкупните приходи од работењето на банката бележат зголемување од 40,6 проценти во однос на истиот период од минатата година.

„Нето-приходите од камата претставуваат основна компонента во формирањето на вкупните приходи од работењето и на 31.3.2023 година тие бележат зголемување од 82,6 проценти во однос на истиот период од минатата година. Притоа, треба да се укаже дека поради затегнувањето на монетарната политика и зголемените каматни стапки, остварен е пораст и на приходите од камати на кредитите дадени на правните лица и населението, но тој пораст е значително, дури неколкукратно помал од порастот на приходите од камати кај нерезидентите, кај финансиските друштва, па и кај државата“, велат од банката.

Оттаму го посочуваат примерот за зголемувањето на каматните приходи остварени кај финансиските друштва, каде што доминираат пласманите во благајнички записи и депозитите во НБРСМ, кои се единаесеткратно поголеми, а кај нерезидентите, каде што доминираат пласманите во странски банки, се и над четиринаесеткратно поголеми од приходите остварени во истиот период минатата година.

„Тоа е затоа што во првиот квартал од минатата година каматната стапка Еурибор беше околу нула проценти или негативна, а оваа година достигна 3,5-4 проценти. Кај благајничките записи, каматите се зголемија од 1,25 на најновите 5,50 проценти, а на државните записи од 0,40 на 3,70 проценти, или 5,25 проценти кај двегодишните државни обврзници, па до 7,14 проценти кај последната еврообврзница“, информираат од банката.

Од Комерцијална банка укажуваат и дека просечната пондерирана каматна стапка на депозитите во странска валута, споредено со истиот период минатата година, е зголемена од 0,25 на 4,39 проценти, додека просечната пондерирана каматна стапка на пласманите во НБРСМ од 0,31 на 3,63 проценти.

„Токму затоа, во билансот на банката, за првпат приходите од камати кај финансиските друштва и нерезидентите збирно се значително поголеми од приходите од каматите кај населението. Или, пак, збирните приходи од каматите кај финансиските друштва, нерезидентите и државата се значително поголеми од приходите од камати кај правните лица. Банката ги оствари овие резултати благодарение на структурата на активата, во која над 55 проценти од пласманите се во парични средства, парични еквиваленти и пласмани во хартии од вредност, што влијаеше на одржување висока ликвидност и профитабилност од каматни приходи“, велат од банката.

Очекувања за 2023 година

Од Комерцијална потенцираат дека макроекономските услови во кои банката ја остварува својата активност во текот на 2023 година се условени од продолжените геополитички тензии од воената инвазија на Русија врз Украина, можното продлабочување на енергетската криза, бавното постпандемиско закрепнување, како и домашните политички случувања. 

„Ваквиот амбиент дејствува неповолно врз изгледите за раст на домашната економија. Високото ниво на неизвесност во домашната економија и на меѓународен план упатува на потребата од поконзервативен пристап во обликувањето на очекувањата за 2023 година, при што се земени предвид проекциите објавени од Министерството за финансии, Народната банка на Република Северна Македонија, Меѓународниот монетарен фонд и Светската банка. Во услови на исклучително голема променливост на претпоставките и висока неизвесност, се очекува стапката на раст на БДП да изнесува 2,6 проценти за 2023 година, иако најновите прогнози на ММФ предвидуваат уште поскромна стапка на раст од 1,4 проценти, поддржана од домашните фактори поврзани со најавените инфраструктурни инвестиции и инвестициите за проширување на капацитетите кај дел од извозниот сектор“, велат од банката. 

Во банката очекуваат макроекономската стабилност во 2023 година да биде одржана преку одржување на ценовната стабилност и стабилноста на номиналниот девизен курс на денарот во однос на еврото.

„Се очекува мерките за субвенционирање на цената на електричната енергија за прехранбената индустрија од страна на државата и замрзнувањето на цените на одредени производи да влијаат врз движењето на инфлацијата, така што таа ќе изнесува од 8 до 9 проценти. Банките ќе ги следат сигналите на Народната банка во однос на монетарната политика и соодветно ќе ги коригираат каматните стапки на депозитите и кредитите“, велат од банката.

Во моментов нема коментари за веста. Биди прв да коментира...

Остави коментар