‚Комерцијална банка‘ урива рекорди во добивката

„Комерцијална банка“ АД Скопје во периодот од 01.01-30.06.2022 година оствари добивка во износ од 1,12 милијарди денари (18,3 милиони евра), што е зголемување за 36,1 проценти во однос на истиот период минатата година кога добивката изнесувала износ од 828,3 милиони денари (13,4 милиони евра).

Планираната бруто-добивка за првото полугодие е остварена со 95,9 проценти. Притоа, остварената добивка пред исправка на вредност, која претставува показател за оперативната способност на банката да ги покрива расходите од работењето, е за 1,4 проценти помала во однос на истиот период минатата година.

„Намалувањето на добивката пред исправка на вредност главно произлегува од помал износ на приходи од капитална добивка од продажба на преземен имот и помалку наплатени претходно отпишани побарувања, додека приходите од редовно работење (нето приходи од камати, нето приходи од провизии и нето курсни разлики) бележат пораст. Позитивниот резултат од работењето банката го оствари во услови на се уште присутни ризици поврзани со идниот тек на пандемијата, зголемена инфлација која поттикна затегнување на монетaрната политика, енергетска криза и воен конфликт помеѓу Русија и Украина, кои се очекува да имаат изразено неповолни ефекти врз глобалната економија“, соопшти банката во коментарот на билансот на успех објавен преку Македонската берза.

Вкупните приходи од работењето изнесуваат 2,5 милијарди денари и бележат зголемување од 3,4 проценти во однос на истиот период од минатата година. Нето-приходите од камата бележат зголемување од 12,6 проценти во однос на истиот период од минатата година главно како резултат на зголемувањето на приходите од камата од кредити дадени на нефинансиски друштва, држава и домаќинства, како резултат на зголемено кредитирање. Планот за анализираниот период е остварен со 103,0%.

Зголемени приходи од провизии и надоместоци

Нето приходите од провизии и надоместоци на 30.06.2022 година изнесуваат 513,9 милиони денари и во однос на истиот период од минатата година бележат зголемување од 4,8 проценти. Планот за анализираниот период е остварен со 101,9 проценти. Нето приходите од курсни разлики на 30.06.2022 година изнесуваат 133 милиони денари и бележат зголемување од 62,2 проценти, главно како резултат на поголемиот промет со клиенти правни и физички лица на девизниот пазар. Планот за анализираниот период е остварен со 158,3 проценти.

Останатите приходи од работењето на банката на 30.06.2022 година изнесуваат 530,7 милиони денари и бележат намалување од 19% во најголем дел како резултат на помалиот износ на реализирани приходи од капитална добивка од продажба на преземен имот и помалку наплатени претходно отпишани побарувања. Планот е остварен со 92 проценти.

Оперативните расходи за периодот 01.01-30.06.2022 година изнесуваат 990,5 милиони денари и во однос на истиот период од минатата година се зголемени за 11,6 проценти како резултат на зголемени материјални трошоци поради зголемена цена на електричната енергија, зголемена амортизација и донации во спортот по принцип на ваучери, како и зголемен износ на плати и други трошоци на вработените поради зголемување на вредноста на бодот за 5 проценти од почетокот на годината и зголемени премии за осигурување на депозитите. Планот е остварен со 105,7 проценти. 

„Во периодот од 01.01-30.06.2022 година банката прокнижи загуба поради оштетување на нефинансиските средства на нето основа во износ од 6,9 милиони денари. Во извештајниот период банката прокнижи исправка на вредност на финансиските средства и посебна резерва за вонбилансни изложености на нето основа во износ од 375,9 милиони денари, наспроти 700,5 милиони денари во истиот период минатата година, што претставува намалување за 46,3 проценти. Намалувањето на нето-исправката на вредност на финансиските средства се должи на повисоката споредбена основа во истиот период минатата година, кога банката издвои поголем износ на резервации за корпоративното портфолио. Банката внимателно ги следи состојбите во домашната економија и во тек е изработка на проценки за очекуваниот квалитет на кредитното портфолио до крајот на годината и неговото влијание врз финансискиот резултат“, информираат од банката.

Минимален пораст на активата

Вкупната актива на банката на 30.06.2022 година достигна износ од 148.595.500.000 денари и бележи минимален пораст во однос на декември 2021 година. Планот е остварен со 98,5 проценти.

Паричните средства и паричните еквиваленти бележат намалување од 11,9 проценти, главно заради намалената состојба на пласираните депозити преку ноќ во НБРСМ, а со цел обезбедување попрофитабилни пласмани. Планот е остварен со 86,5 проценти. Средствата за тргување бележат зголемување за 14 проценти како резултат на поголем износ на купени од продадени акции во извештајниот период. Планот е исполнет со 113,8 проценти. Финансиски средства по објективна вредност преку билансот на успех определени како такви при почетното признавање во износ од 352,4 милиони денари се состојат од вложувања во удели во инвестициски фондови.

„Кредитите на и побарувањата од банки бележат зголемување од 36,2 проценти, кое се должи главно на одобрени кредити за ликвидност на домашни банки. Покрај тоа, во оваа позиција зголемување бележат и пласманите во странски банки над 3 месеци, што се должи на позитивните придвижувања на каматните стапки кај странските банки во услови на зголемени референтни стапки од страна на ФЕД. Планот е исполнет со 135 проценти. Кредитите на и побарувањата од други комитенти бележат зголемување од 8,4 проценти како резултат на зголемено кредитирање на секторите нефинансиски друштва и домаќинства, поради отпочнатото економско заздравување од крајот на минатата година. Планот е остварен со 106,8 проценти“, соопшти банката.

Оттаму додаваат дека вложувањата во хартии од вредност се зголемени за 4,1 проценти главно како резултат на запишани државни записи во денари и со валутна клаузула, како и македонски еврообврзници. Планот е остварен со 102,9 проценти. Преземените средства врз основа на ненаплатени побарувања се намалени за 2,1 проценти и имаат минимално учество во вкупната актива.

Вкупните депозити (депозити на комитенти и депозити на банки) достигнаа износ од 131.361.800.000 денари и бележат зголемување од 0,2 проценти. Планот е остварен со 98,7 проценти. 

„Врз состојбата на вкупните депозити во текот на првото полугодие влијание имаат следните настани:одливите на средства од сметките на енергетските компании на почетокот на годината заради зголемените цени на  електричната енергија, распределбата на остатокот од стечајната маса на Еуростандард банка АД во стечај,  повлекување на штедните влогови на домаќинствата во март како психолошка реакција на отпочнувањето на воениот конфликт во Укарина, стабилизирање на состојбите во текот на мај и јуни и враќање на депозитите на домаќинствата на патеката на стабилен раст, што придонесе и за раст на вкупните депозити“, соопшти банката.

Обврските по кредити достигнаа износ од 747,9 милиони денари и се зголемени во однос на декември 2021 година за 4,8 проценти. Планот е остварен со 107,4 проценти.

Очекувања за претстојниот период

Покрај натамошното неповолно влијание на здравствената криза и ризиците поврзани со истата, макроекономските услови во кои банката ќе ја остварува својата активност до крајот на 2022 година се исто така условени и од геополитичките состојби – особено кризата во Украина и нејзините ефекти врз економијата на ЕУ, како и состојбата со достапноста и цената на енергенсите и храната, велат од Комерцијална банка.

„Ваквите тековни состојби се очекува да имаат изразено неповолни ефекти врз глобалната економија и би се прелеале соодветно и во домашната економија. Од друга страна, отпочнувањето на евроинтеграциските процеси на Државата се очекува да има позитивни ефекти врз економската активност. Високото ниво на неизвесност во домашната економија и на меѓународен план упатуваат на потребата од поконзервативен пристап во обликувањето на очекувањата за 2022 година. По остварениот раст од 4 проценти во текот на 2021 година, се очекува домашната економска активност умерено да забави, додека инфлаторните притисоци се очекува да продолжат до крајот на годината, а забавување на инфлацијата би било можно во текот на 2023 година“,соопшти банката.

Оттаму додаваат дека се очекува да биде одржана макроекономската стабилност во Република С. Македонија преку одржување на ценовната стабилност и стабилноста на номиналниот девизен курс на денарот во однос на еврото.

„Банките ќе ги следат сигналите на Централната банка во однос на затегнувањето на монетарната политика и соодветно ќе ги корегираат каматните стапки на депозитите и кредитите. Комерцијална банка ќе ги презема сите неопходни активности за прилагодување кон новонастанатите состојби, при што и во следниот период ќе биде фокусирана пред се’ на одржување на квалитетот на портфолиото и изнаоѓање флексибилни решенија на барањата на клиентите, ефикасно управување со зголемените трошоци, натамошна дигитализација на процесите и модернизација на деловната мрежа“, соопшти банката. 

Во моментов нема коментари за веста. Биди прв да коментира...

Остави коментар