Како цената на гасот ја стопи добивката на „Макпетрол“

„Макпетрол“ АД Скопје во текот на 2023 година остварил добивка од 770,7 милиони денари (12,5 милиони евра), што е намалување за 40 проценти во однос на претходната година, кога добивката на компанијата изнесувала 1,2 милијарда денари (20,9 милиони евра).

„Во текот на 2023 година опкружувањето во кое работеше друштвото сè уште беше нарушено, и тоа во најголем дел поради воениот конфликт помеѓу Русија и Украина, кој има силно влијание на цените на енергентите на светските берзи. Исто така, во 2023 година дојде до воени судири на Блискиот Исток во Појасот Газа, помеѓу Израел и палестинското движење Хамас, со што мирот и безбедноста во светот дополнително беа загрозени“, велат од компанијата.

Оттаму додаваат дека кризата во светската економија продолжила и во 2023 година, иако цените на енергентите, храната, металите и другите стоки значително се намалија на светските берзи во споредба со 2022 година.

„Економскиот раст беше бавен, а каматните стапки и инфлацијата останаа на високо ниво. Со цел намалување и контрола на домашната инфлација, Народната банка во текот на 2023 година презеде монетарни мерки и во повеќе наврати ги зголеми референтните каматни стапки“, велат од компанијата.

Од „Макпетрол“ посочуваат дека продолжувањето на воените конфликти, намалувањето на цените на енергентите, монетарните мерки и високата инфлација неминовно влијаеле и врз работењето на компанијата.

„Но, како резултат на посветеноста и ангажираноста на раководството, во текот на 2023 година друштвото обезбеди непрекинато снабдување на македонскиот пазар со нафтени деривати и природен гас, иако се справуваше со локална и светска неизвесност. И покрај сите предизвици, во текот на 2023 година ’Макпетрол’ АД оствари позитивни резултати, иако приходите и добивката забележаа пад“, велат од компанијата.

Инаку, во текот на 2023 година „Макпетрол“ оствари вкупен приход во износ од 30,4 милијарди денари (494 милиони евра), што е намалување за 19,15 проценти во однос на претходната година.

Во структурата на приходите, најголем удел со 98,78 проценти имаат приходите од продажба, од кои 96,25 проценти се остварени преку продажба на домашен пазар, а само 2,53 проценти се остварени преку продажба на странски пазар. Падот на приходите, споредбено со минатата година, во најголем дел се должи на намалените приходи на големо за 57,8 проценти, а истите тие учествуваат со 13,26 проценти во приходите од продажба.

„Главни причини за намалување на приходите на големо е падот на продажбата на природен гас од 37,1 проценти, како и падот на продажбата на млазно гориво од 51,92 проценти. Во текот на 2023 година, при неповолни економски услови, друштвото како потврден лидер на малопродажниот пазар го зголеми количествениот промет со нафтени деривати на мало за 6,47 проценти“, објаснуваат од компанијата.

Од „Макпетрол“ информираат дека го прошириле малопродажниот асортиман што се нуди на бензинските станици, а прометот со истиот тој се зголемил за 15,13 проценти.

„Но и покрај зголемувањето на количествениот промет, приходите на мало бележат пад од 5,99 проценти како резултат на намалувањето на цените на нафтените деривати на светските берзи, кои како набавни цени зафаќаат најголем дел од малопродажната цена на дериватите“, велат од компанијата.

Вкупните расходи остварени во 2023 година во однос на претходната година се намалени за 18,3 проценти.  

„Падот во најголем дел се должи на намалените расходи за набавна вредност на трговски стоки од 20,65 проценти, поради стабилизацијата на цените на светските берзи како резултат на моменталното надминување на предизвиците од светската енергетска криза, која сѐ уште не се смета за завршена“, велат од компанијата.

Во моментов нема коментари за веста. Биди прв да коментира...

Остави коментар