„Комерцијална банка“ оствари добивка од 71,9 милиони евра за девет месеци

„Комерцијална банка“ во периодот јануари-септември годинава остври добивка од 4,4 милијарди денари (71,9 милиони евра), што е зголемување за 45,1 проценти во однос на истиот период минатата година кога добивката на банката изнесуваше околу три милијарди денари (49,5 милиони евра), покажува неревидираниот биланс на успех на банката објавен преку Македонската берза.

Од банката информираа дека планираната бруто-добивка заклучно со третиот квартал од 2024 година е остварена со 139,3 проценти.

„Притоа, остварената добивка пред исправка на вредност, која претставува показател за оперативната способност на банката да ги покрива расходите од работењето, е за 36,4 проценти поголема во однос на истиот период минатата година“, соопшти банката.

Оттаму објаснуваат дека зголемувањето на добивката пред исправка на вредност главно произлегува од зголемените останати приходи од дејноста и зголемените нето приходи од камата, а во помал обем и поради зголемените нето приходи од провизии и надомести и нето приходи од тргување.

„Позначителното зголемување на останатите приходи од дејноста во споредба со истиот период минатата година е резултат на зголемените приходи од капитална добивка од продажба на преземен имот, како и поради зголемениот износ на наплатени претходно отпишани побарувања“, наведуваат од банката.

Вкупните приходи од работењето на „Комерцијална банка“ бележат зголемување од 29,5 проценти во однос на истиот период од минатата година. Нето-приходите од камата претставуваат основна компонента во формирањето на вкупните приходи од работењето и на 30.09.2024 година истите бележат зголемување од 16,2 проценти во однос на истиот период од минатата година. Планот за анализираниот период е исполнет со 113,4 проценти.

„Приходите по основ на камата се зголемени вкупно за 20 проценти како резултат на зголемени пласмани кај клиентите од сите сектори, при што единствено кај нерезидентите отпочна трендот на намалување на каматните стапки споредено со истиот период минатата година заради намалувањето на трите основни каматни стапки од страна на ЕЦБ“, соопшти банката.

Нето-каматната маржа на ниво на банката се зголеми од 3,56 проценти заклучно со крајот на третиот квартал од минатата година, на 3,87 проценти заклучно со третиот квартал годинава.

„Нето приходите од провизии и надоместоци бележат зголемување од 9,9 проценти во најголем дел како резултат на зголемениот обем на активности, особено во делот на работењето со картички“, соопшти банката.

Инаку, од банката дополнително информираа дека Надзорниот одбор на денешната седницата одлучил дел од тековната добивка за периодот 01.01-30.09.2024 година да се вклучи во пресметката на редовниот основен капитал на „Комерцијална банка“ АД Скопје.

„Предвидениот износ од тековната добивка од 1,6 милијарди денари (27,2 милиони евра) е утврден во согласност со одлуката за методологијата за пресметка на адекватноста на капиталот и ќе се вклучи единствено во пресметката на сопствените средства со состојба 31.12.2024 година, по добиена согласност од НБРСМ“, информираат од банката.

Оттаму додаваат дека конечниот предлог за распределба на добивката за 2024 година ќе се донесе од Надзорниот одбор на банката најдоцна до февруари 2025 година и за предлогот ќе одлучува Собранието на акционери на банката.

„Потребното зголемување на редовниот основен капитал на ‚Комерцијална банка‘ АД Скопје е во насока на поддршка на динамичниот кредитен раст во текот на 2024 година заради настојувањето банката да ја задржи својата пазарна позиција во услови на зголемени конкурентски притисоци и континуираното зголемување на вкупните капитални барања пропишани од НБРСМ“, велат од банката.

Во моментов нема коментари за веста. Биди прв да коментира...

Остави коментар