Римац основа компанија за развој на револуционерни батерии

„Римац технолоџи“ (Rimac Technology), една од компаниите во „Римац груп“ (Rimac Group), ја основа „Римац енерџи“ ( Rimac Energy), која ќе работи на следната генерација на системи за складирање енергија (Energy Storage System  - ESS), со намалување на загубите на енергија до 50 проценти, на 40 проценти помала површина, објавија во четвртокот од „Римац груп“.

Портфолиото на производи од брендот „Римац енерџи“ вклучува ESS за примена во електричната мрежа, комерцијалниот и индустрискиот сектор, како и високоинтегрирани решенија за полначи за електрични возила. Сите производи се целосно дизајнирани, развиени и произведени во Европа.

Овој чекор, истакнуваат од „Римац груп“, претставува значајна пресвртница за компанијата, која се проширува надвор од својата силна позиција во технологијата за електрични возила со високи перформанси, воведувајќи иновативни системи за складирање енергија. Реализацијата на целосниот потенцијал за производство на обновлива енергија и поттикнувањето на декарбонизацијата на енергетските мрежи се поврзани токму со решенија од овој тип.

Тим од 60 вработени

Тимот на „Римац енерџи“, специјализиран тим во рамките на „Римац технолоџи“, се развил во текот на изминатите 18 месеци и денес се состои од 60 вработени  - од кои сите што моментално работат на првата генерација на ESS.

„Потпирајќи се на високата експертиза и стандарди демонстрирани во развојот и производството на електрични возила, 'Римац енерџи' ја применува истата инженерска филозофија во развојот на стационарни батерии. Како резултат на тоа, 'Римац енерџи' разви нова архитектура на батерии што ги намалува загубите до 50 проценти, при што зафаќа 40 проценти помала површина во споредба со најмодерните решенија. Дополнителните технолошки предности вклучуваат продолжен животен век, зголемена достапност и конкурентни цени на самиот систем и неговата инсталација“, се наведува во соопштението на „Римац груп“. 

Првично, „Римац енерџи“ ќе обезбеди решенија во комерцијалниот и индустрискиот сектор, како поддршка за електричната мрежа, а решенијата за брзо и мегаватно полнење веќе се во тек.

Најпрво комерцијалниот сектор

Компанијата во моментов преговара за неколку проекти со клиенти, меѓу кои и пилот-проект со една од водечките компании во областа на обновливите извори на енергија, која бара решенија за батерии за складирање енергија за поддршка на своите соларни и ветерни електроцентрали.

Се очекува пилот-системите да бидат произведени до крајот на годинава, а пуштањето во употреба е планирано за 2024 година. Сериското производство треба да започне во 2025 година во кампусот „Римац“, кој моментално е во изградба, со постепено зголемување на производствениот капацитет на десетици гигават-часа (GWh).

Основачот и извршен директор на „Римац груп“, Мате Римац, истакнува дека има итна потреба од чиста енергетска инфраструктура за поддршка на интеграцијата на обновливите извори на енергија во мрежата преку обезбедување опции за складирање и балансирање на енергијата.

„Со оглед на нашето искуство во технологијата за електрични возила со високи перформанси и посветеноста на одржливиот развој, овој пат изгледа како природен прогрес за нас. Нашиот тим навистина се радува на создавање решенија што ја прават чистата енергија подостапна, додека се стремиме да ја намалиме нашата зависност од фосилните горива и да придонесеме за позелена иднина“, нагласи Мате Римац.

Детали за уникатната технологија зад брендот „Римац енерџи“, кој се развива во фабриката на „Римац технолоџи“ во Загреб, ќе бидат откриени подоцна годинава, објави групацијата.

Во моментов нема коментари за веста. Биди прв да коментира...

Остави коментар