Пред неколку месеци, Френк Холдинг Џуниор, раководеше со малку познат заемодавец во Северна Каролина. Сега, по превирањата во регионалните банки во Америка, може да се пофали со најбрзорастечко богатство во светот.
Од последните денови на март, вредноста на уделот што Холдинг и неговото пошироко семејство го имаат во „Фрст Ситизенс“ (First Citizens BancShares Inc.) се удвои, откако заемодавецот со седиште во Ралеј се појави како купувач на средствата на банката „Силикон валеј“ (СВБ).
Земајќи ги предвид рекордно високите акции во моментов, тој удел вреди околу 2,2 милијарди долари, според индексот на милијардери на „Блумберг“. Акциите поскапеа за 7,5 отсто до 1.175,35 долари во средата, откако банката објави дека депозитите ги надминале проценките по договорот за спас на СВБ - метрика која внимателно се следи по колапсот на заемодавецот од Калифорнија.
Семејството зад „Фрст Ситизенс“ поседува најмалку пет филијали, а пошироката групација, покрај Френк Холдинг, ја сочинуваат неколку од извршните директори на банката, вклучувајќи го и претседателот, Питер Бристоу. Корените на династијата можат одат 125 години наназад, во филијала која била основана во руралните делови на Северна Каролина со капитал од 10.000 американски долари.
Уделот во „Фрст Ситизенс“ го сочинува најголемиот дел од богатството на семејството, кое исто така доби најмалку 35 милиони долари од дивиденди и продажба на акции во изминатите четири децении и го прошири својот бизнис во комерцијални недвижности и земјоделство.
Тежок почеток на годината
Годината започна лошо за „Фрст Ситизенс“, со пад на акциите за речиси 40 отсто во двата месеца до средината на март, бидејќи инвеститорите станаа нервозни поради нивоата на депозити и нереализираните загуби од инвестициите во обврзници во повеќе помали банки. Сепак, откако „Фрст Ситизенс“ објави дека ќе ја купи СВБ, нејзините акции се зголемија повеќе од двојно, во споредба со падот од 15 отсто на регионалниот банкарски индекс КВБ (KWB).
Иако семејството не поседува мнозинство од капиталот на „Фрст Ситизенс“, успеа да ја задржи контролата врз банката користејќи двојна структура на удел. Холдинг и неговите роднини поседуваат акции од Б-класа со по 16 права на глас и секој има по еден глас за акции од А-класа. Своето богатство го пренесувале од генерација на генерација преку префрлање на акции во бројни фондови.
Холдинг стана извршен директор во 2008 година, следејќи ги неговиот татко и вујко во водењето на бизнисот. Тој помогна да се прошири „Фрст Ситизенс“, откупувајќи најмалку десетина пропаднати заемодавци откако ја презеде главната работа.
Холдинг веќе го искористи колапсот на СВБ со тоа што им се придружи на другите директори на регионални банки во откупот на акции во нивните компании. Холдинг потроши 260.000 долари за купување акции на „Фрст Ситизенс“ на почетокот на март за 650 долари по акција, покажуваат регулаторните документи. Сега вредат 81 отсто повеќе.
.webp){kind=icon}
Во моментов нема коментари за веста. Биди прв да коментира...