Се најде купувач за пропаднатата банка СВБ

„Фрст ситизенс“ (First Citizens BancShares) се согласи да ја купи банката „Силикон валеј“ (Silicon Valley Bank / SVB), која беше запленета од регулаторите кон средината на месецот.

Заемодавецот со седиште во Северна Каролина склучи договор за купување и преземање на сите депозити и заеми на СВБ, се вели во соопштението на Федералната корпорација за осигурување депозити (FDIC).

Договорот вклучува купување на имотот на СВБ за околу 72 милијарди долари со попуст од 16,5 милијарди долари. Околу 90 милијарди долари во хартии од вредност и други средства ќе останат во стечај, за располагање кај FDIC, додека федералната институција исто така доби право на сопственички капитал во „Фрст ситизенс“ во вредност од 500 милиони долари. Проценетиот трошок на пропустот на Фондот за осигурување депозити е околу 20 милијарди долари, иако точниот обем ќе се утврди кога ќе се заврши извршната постапка, стои во соопштението.

„Ова беше исклучителна трансакција во партнерство со FDIC, што треба да влее доверба во банкарскиот систем“, наведува во соопштение Френк Холдинг, главен извршен директор на „Фрст ситизенс“.

На почетокот на месецов, СВБ неочекувано стана најголемиот американски заемодавец што пропаднал, по повеќе од една деценија. Банката претрпе огромна загуба од продажбата на своите хартии од вредност поради зголемените каматни стапки, вознемирувајќи ги инвеститорите и штедачите, кои брзо почнаа да ги вадат своите пари. Само на 9 март инвеститорите и штедачите се обиделе да повлечат околу 42 милијарди долари.

Регулаторите брзаа да го затворат договорот за целата банка или делови од неа во обид да ги покријат неосигурените депозити на клиентите, но претходниот обид за аукција заврши без купувач.

Bloomberg

FDIC го продолжи процесот на наддавање откако повеќе потенцијални купувачи покажаа „значителен интерес“. За да го рационализира процесот и да го прошири обемот на понудувачи, FDIC им дозволи на страните да поднесат посебни понуди за подружницата „Силикон валеј прајват“ (Silicon Valley Private Bank) и банката „Силикон валеј бриџ“ (Silicon Valley Bridge)  - фирма создадена од FDIC откако СВБ банкротира.

Американските власти презедоа вонредни мерки за зајакнување на довербата во финансискиот систем по колапсот на банката, воведувајќи нова заштита за банките за кои претставниците на Федералните резерви рекоа дека се доволно големи за да ги заштитат депозитите во целата земја.

Акциите на СВБ паднаа откако компанијата со седиште во Санта Клара, Калифорнија, ги претстави плановите за понуда на капитал, обелоденувајќи дека претрпела загуба од 1,8 милијарда долари од продажбата на хартии од вредност и забавување на финансирањето во фирмите за ризичен капитал што ги опслужува. Банката беше принудена да се откаже од својот план за собирање капитал бидејќи фондовите почнаа да ги советуваат своите портфолио-компании да ги повлечат парите од СВБ.

 „Фрст ситизенс“ претходно поднесе понуда за СВБ веднаш откако пропадна, велат изворите.

Нејзиниот интерес за аквизиција збуни некои набљудувачи, кои се прашуваа дали „Фрст ситизенс“ има ресурси да се соочи со вториот по големина банкарски колапс во историјата на САД.  „Фрст ситизенс“ беше 30-та најголема комерцијална банка во САД по имот на крајот на 2022 година, според податоците на Федералните резерви.

Сепак, банката има искуство во купување паднати ривали. Од 2009 година купи повеќе од 20 банки со помош на FDIC, склучувајќи серија договори по финансиската криза, од Вашингтон, преку Висконсин, до Пенсилванија.

Во моментов нема коментари за веста. Биди прв да коментира...

Остави коментар