.webp){kind=icon}
„Леново“ (Lenovo Group) оствари 62 милијарди долари приход и нето-добивка од 1,6 милијарда долари во финансиската година што заврши на 31 март 2023, објави групацијата, истакнувајќи дека нејзината оперативна маржа достигнала највисоко ниво во последните 20 години. Извршниот одбор на компанијата објави конечна дивиденда за фискалната година во износ од 3,8 американски центи по акција.
Намалената побарувачка за уреди на пазарот се одрази и на приходите на групацијата, но приходите од деловни активности што не се поврзани со компјутери достигнаа рекордна стапка во фискалната година од речиси 40 отсто. Растот на приходите е поттикнат од различните двигатели на растот во деловните единици Solutions and Services Group (ССГ) и Infrastructure Solutions Group (ИСГ), во кои растот на приходите достигна рекордни 6,7 и 9,8 милијарди американски долари, соодветно, што е зголемување за 22 проценти и 37 проценти во однос на претходната година.
„’Леново’ постигна стабилна профитабилност во претходната фискална година, бидејќи нашите диверзифицирани двигатели на раст продолжуваат да даваат клучни резултати. Нивниот момент води постојан напредок во нашата трансформација придвижена од услугите, а комбинираните приходи на нашите бизниси што не се поврзани со компјутери се зголемија за речиси 40 проценти“, рече претседателот и извршен директор Јуанкинг Јанг.
Приходите на ИСГ пораснаа на речиси 10 милијарди долари, што е зголемување од 37 отсто во однос на претходната година, со рекорден оперативен профит од 98 милиони долари. Приходите од работењето на серверите се зголемија на рекордно ниво и речиси 30 отсто во споредба со претходната година, со што „Леново“ стана трет најголем снабдувач на сервери во светот, посочуваат од компанијата.
ИСГ инвестира во инфраструктурни иновации засилени од вештачката интелигенција (ВИ), како што е „еџ компјутингот“ (edge computing) поттикнат од вештачка интелигенција и хибриден облак, што групата го гледа како следниот бран на можности за раст.
ССГ лани оствари приход од 6,7 милијарди долари, што е највисок приход што досега го остварил, а во однос на лани е за 22 отсто поголем, со висока оперативна маржа од 21 отсто.
„Леново“ очекува дека вкупниот пазар за компјутери и паметни уреди ќе продолжи со годишен раст во втората половина на 2023 година и дека пазарот за ИТ-услуги ќе продолжи со релативно висок раст. Заедно, тоа ќе го врати целокупниот ИТ-пазар на умерен раст во 2023 година, како што велат од компанијата.
Во текот на минатата година, „Леново“ ги зголеми своите годишни вложувања во истражување и развој на „новиот ИТ“ (клиент, еџ, облак, мрежа и интелигенција) на 2,2 милијарди долари, што е за шест отсто повеќе во споредба со претходната година. На среден и долг рок, дигиталната и интелигентна трансформација ќе продолжи да се забрзува, што ќе доведе до голем раст за облак и компјутерската инфраструктура, оценува групацијата.
Во четвртиот квартал групацијата спроведе еднократно реструктурирање во износ од 249 милиони долари со цел да постигне околу 850 милиони долари годишни заштеди, се наведува во соопштението.
