„Форд“ (Ford Motor Co) склучи договор со конкурентската компанија „Тесла“ (Tesla Inc) за да им овозможи на своите клиенти на електрични возила пристап до мрежата на брзите полначи на „Тесла“ (Tesla Supercharger).
Возилата „форд Ф-150 лајтнинг“ (Ford F-150 Lightning), „мустанг меч-Е“ (Mustang Mach-E) и „Е-транзит“ (E-Transit) од следната година ќе можат да се напојуваат со 12.000 суперполначи низ Северна Америка со помош на адаптер. Возилата од следната генерација на „Форд“, почнувајќи од 2025 година, ќе имаат вградена способност за полнење на „Тесла“.
Партнерството го прави „Форд“ првиот голем производител на автомобили што го усвои таканаречениот северноамерикански стандард за полнење на „Тесла“, давајќи им на своите клиенти пристап до најголемата, најбрза и најсигурна мрежа на полначи за електрични возила. Пристапот до сигурно полнење е голема грижа за тие што се заинтересирани да купат електричен автомобил.
„Навистина сме возбудени што работиме со вас за да го подобриме животот на нашите клиенти“, рече главниот извршен директор на „Форд“, Џим Фарли. Тој и Илон Маск го окарактеризираа партнерството како помагање да се забрза усвојувањето електрични возила. Маск е извршен директор на „Тесла“ и сопственик на „Твитер“ (Twitter).
Од „Форд“ рекоа дека за да ги користат клиентите брзите полначи следната година, ќе треба да направат ажурирање на софтверот и да платат. Маск рече дека адаптерите за полнење нема да бидат прескапи, иако ниту еден од извршните директори не посочи точна цена.
Фарли рече дека клиентите на „Форд“ сè уште ќе можат да ги користат своите стари полначи, познати како конектори за комбиниран систем за полнење.
Во февруари производителот на електрични возила предводен од Маск рече дека до крајот на 2024 година ќе им овозможи на другите автомобилски компании поголем пристап до своите полначи. Фарли и Маск исто така се пофалија еден со друг за нивните компании, при што извршниот директор на „Форд“ рече дека сака електричните возила на неговата компанија да ги направи целосно достапни за ажурирања на софтверот како и возилата на „Тесла“.
„Многу е тешко тоа што го направи 'Тесла'. И јас целосно ги почитувам“, рече Фарли. Инаку, „Тесла“ контролира речиси 60 проценти од американскиот пазар на електрични возила, а „Форд“ беше втор минатата година, но далеку зад лидерот на пазарот. Фарли рече дека има цел на крајот да ја престигне „Тесла“.
.webp){kind=icon}
