.webp){kind=icon}
Акционерите на „Нетфликс“ (Netflix Inc.) гласаа против новиот пакет за плати на извршното раководство во компанијата, вклучувајќи ги и двајцата директори, Тед Сарандос и Грег Питерс. Одлуката е необврзувачка, но претставува протест против расипничките плати на високиот менаџмент.
Сарандос треба да заработи дури 40 милиони долари (збир на плата, бонуси и акции), додека Питерс, кој беше именуван за втор директор на компанијата во јануари, треба да заработи 34,6 милиони долари. Рид Хестингс, ко-основач и претседател на компанијата, ќе заработи три милиони долари.
Акционерите гласаа против предложените надоместоци на годишното собрание, вели извор на „Блумберг“. Одборот на „Нетфликс“ може да ја игнорира одлуката, што се случило претходно, иако гласањето е значајно со оглед на актуелната расправија меѓу големите холивудски студија и сценаристите.
Познатите холивудски сценаристи ги критикуваа медиумските компании кои на нивните раководители им исплаќаат превисоки плати, меѓу другото посочувајќи ги и платите на шефот на „Дизни“ (Walt Disney Co.) Боб Игер и шефот на „Ворнер Брос“ (Warner Bros. Discovery Inc.) Давид Заслав. Сценаристите велат дека бараат покачување на платите кое вкупно е помало од она што го добиваат неколку магнати годишно. Здружението на сценаристи на Америка (WGA) започна штрајк на почетокот на мај, при што неговите членови бараа повисоки плати во услови на брзи промени во начинот на кој луѓето ги гледаат нивните серии и филмови.
Повеќето акционери гласаа дури и пред Здружението кое ги застапува интересите на повеќе од 11.500 сценаристи, да побара јавно преку писмо акционерите да гласаат против пакетот, вели изворот, кој сакаше да остане анонимен.
