Утврдени максимални трошоци за брзите кредити

Финансиско друштво нема да може да склучи договор за потрошувачки  кредит ако трошоците што не влегуваат во годишната стапка на вкупни трошоци надминуваат 60 проценти од износот на одобрениот кредит. Ова е една од законските измени што ги подготви Министерството за финансии, а кои беа усвоени во Собранието, информираа денеска од Министерството за финансии. 

Поконкретно, надоместоците се однесуваат на сите трошоци што потрошувачот ги плаќа или има обврска да ги плати во текот на целиот период на важност на договорот, а кои произлегуваат или на каков било начин се поврзани со договорот за потрошувачки кредит или поврзани услуги, и тие нема да може да бидат повеќе од главнината на кредитот.

Од Министерството за финансии велат дека со Законот се обезбедува значително поголема заштита на граѓаните корисници на услугите на финансиските друштва или тие што се познати како даватели на таканаречените брзи кредити и зголемување на довербата во финансиските друштва, и тоа преку утврдување на максималниот износ на сите трошоци поврзани со кредитот, укинување на можноста за земање кредит за затворање на претходно достасан кредит во исто финансиско друштво, укинување на можноста трговските друштва што поседуваат дозвола или лиценца во согласност со Законот за игрите на среќа и за забавните игри да можат да бидат кредитни посредници на финансиско друштво, односно да нудат кредитни производи.

Финансиските друштва ќе имаат обврска да воспостават систем за управување со кредитен ризик, кој се однесува на оценување на кредитната способност на клиентот за враќање на кредитот, како и оцена на загуба на финансиското друштво поради неможност клиентот да ги намирува своите обврски во договорениот износ или рокови.

„Законот го зајакнува и надзорот врз работењето на финансиските друштва, по примерот на другите регулатори, за што ќе биде пропишан и донесен посебен правилник. Исто така, предвидени се и глоби од 8.000 до 10.000 евра за непочитување на законските одредби“, велат од Министерството.

Оттаму информираат дека позначајна промена е зголемување на износот на основната главнина за основање на финансиското друштво од 100.000 евра на 500.000 евра, при што таа не може да биде обезбедена од заеми или кредити. Законските измени пропишуваат и дека дозволата ќе му биде одземена на финансиското друштво ако во рок од една година му се изречат две мерки, односно глоба или привремена забрана за вршење активност.

 

 

Во моментов нема коментари за веста. Биди прв да коментира...

Остави коментар