Може ли Твитер да го преживее доаѓањето на Тредс?

Доаѓањето на новиот конкурент сериозно ја загрози позицијата на Твитер, кој во последно време минува низ разни турбуленции, а неговите акции губат вредност. Но со лансирањето на Тредс (Threads) на „Мета“, дали инвестицијата на јужноафриканскиот магнат е навистина загрозена?

За помалку од една година, Илон Маск го сврте целиот Твитер наопаку, го смени менаџментот, отпушти голем број вработени и ја „подобри“ политиката за управување со содржината. Неговите потези наидоа на различни реакции  - некои предупредуваат за длабоко вкоренети проблеми во компанијата, други за промени во однос на слободата на говорот.

Инвестициската компанија „Фридом фајненс“ (Freedom Finance Europe) прашува дали ситуацијата ќе се промени на подобро или ќе пропадне една од најголемите социјални мрежи во светот. Во моментов, сметаат тие, Маск нема многу причини за оптимизам бидејќи „изгубил 20 милијарди долари“ откако ја купи компанијата за 44 милијарди долари во 2022 година. Неговите деловни потези предизвикаа мали сомнежи кај инвеститорите и наведоа многумина да размислуваат за продажба на акциите.

Доаѓањето на новата социјална мрежа Тредс може да создаде голем проблем за Твитер и да ја искомпликува ситуацијата на пазарот, велат од „Фридом фајненс“. Покрај Тредс, „Мета“ ги поседува и Фејсбук, Инстаграм, Ватсап, кои би можеле да бидат од голема корист. Заедницата на „Мета“ има 2,9 милијарди корисници, додека Твитер има 330 милиони.

„Ова се почувствува веќе првиот ден кога излезе новиот производ од фабриката за социјални мрежи на Марк Закерберг. Со 30 милиони преземања во првите 24 часа и повеќе од 70 милиони корисници до денес, Тредс, како најсимнувана апликација во историјата, му стана опасен конкурент на сродниот Твитер“, тврдат од „Фридом фајненс“.

Тие посочуваат дека предноста на Тредс е што корисничката сметка може да се поврзе со Инстаграм и дека е дозволено неограничено пишување, односно бројот на знаци во објавата нема лимит. „Токму слободата би можела да биде одлучувачки фактор и ’продажна точка’ за Тредс, за која се предвидува дека ќе има повеќе од 230 милиони корисници во 2024 година“, велат од инвестициската куќа.

Bloomberg

Различна публика

Твитер секојдневно се подобрува и нема така лесно да му го отстапи приматот на најлутиот противник.

„Би било несоодветно да се каже дека Тредс ја презема сцената, бидејќи нивните корисници се различни на многу начини. На пример, Твитер е насочен кон голем број високообразовани млади мажи, додека Инстаграм цели на жени од 18 до 49 години и публика што нема завршено средно образование, па сè уште е тешко да се открие вистинската база за Тредс. Инстаграм напредуваше поради неговата едноставност, но се поставува прашањето дали Тредс може да го направи истото тоа со малку поинаков тип на содржина“. 

Од инвестициската куќа, сепак, нагласуваат дека е тешко да се предвиди развојот на ситуацијата. Тие се убедени дека поврзувањето на платформата Тредс со Инстаграм ќе ја олесни интеграцијата во секојдневниот живот на корисниците.

Болни точки

Од друга страна, наведуваат оттаму, „Мета“ со години се бори со одржливоста и постојано флуктуирање на цените на акциите. Затоа, клучно е нивните инвеститори да видат каде плови бродот на Закерберг и дали тој може да ја држи главата над вода.

„Ветувањето за комуникациска револуција ќе треба да се исполни за Тредс да остане релевантен по првичната возбуда. Ова може да потрае некое време, бидејќи успехот и имплементацијата на новата платформа сè уште не се јасни. Инвеститорите може да чекаат да видат колку добро 'Мета' може да го монетизира производот и дали тоа може да доведе до одржлив раст на приходите“, анализира „Фридом фајненс“.

Оттаму додаваат и дека „Мета“ мора да се стабилизира поради губењето на тужбата пред Европскиот суд за непочитување на антимонополските прописи, даночните закони и заштитата на податоците. Ваквиот исход имаше своевидно влијание врз кохезијата на компанијата, довербата на корисниците и цената на акциите.

Сепак, како што тврдат, американската компанија има големо искуство во управувањето со кризи и, освен финансиските последици, навидум неоштетена ќе се извлече од целата приказна. „Клучно е 'Мета' да ги реши овие проблеми преку почитување на правилата, транспарентни практики и проактивни напори за заштита на податоците на корисниците и решавање на даночните проблеми. Во овој случај компанијата ќе продолжи со својот раст и постепено ќе ја враќа довербата на корисниците и инвеститорите“. 

Новиот ривал на Твитер има повеќе болни точки. Тредс уште не е достапен на европскиот пазар и не се знае точно кога ќе стане, па, така, постои реторика за недоволна покриеност, што може да предизвика незаинтересираност од корисниците.

„Вкупниот приход на пазарот за социјално вмрежување се предвидува да достигне 124,6 милијарди долари во 2023 година. Исто така, се очекува годишна стапка на раст за периодот од 2022 до 2027 година, од 6,86 проценти, што ќе резултира со проектирана големина на пазарот од 183,1 милијарди долари до 2027 година. Имајќи го тоа предвид, останувањето во сферата на социјалните мрежи изгледа доста привлечно, а проширувањето на европските и другите пазари мора да биде примарна цел на 'Мета'“, заклучуваат инвестициските експерти.

Во моментов нема коментари за веста. Биди прв да коментира...

Остави коментар